Órtti erte anyqtaıtyn júıe ýtılalym qarajaty esebinen ornatylýy múmkin
ASTANA. KAZINFORM — Oblys ákimdikteri órtti erte anyqtaý júıesin engizý jumystaryn júrgizip otyrǵan joq. Bul týraly Úkimet otyrysynda Ekologııa jáne tabıǵı resýrstar mınıstri Erlan Nysanbaev aıtty.
«Bıyl qoldanystaǵy órtti erte anyqtaý júıeleri Tótenshe jaǵdaılar mınıstrliginiń Daǵdarysty basqarý ortalyǵyna qosyldy. Aldaǵy ýaqytta júıelerdi respýblıka boıynsha engizý kezeń-kezeńimen júzege asyrylatyn bolady. 2025 jylǵa „Semeı ormany“ rezervatynda júıe ornatýǵa bıýdjettik ótinim qoldaý tapty. Sonymen qatar, ákimdikter órtti erte anyqtaý júıesin engizý jumystaryn júrgizip jatqan joq. Osyǵan baılanysty elimizdiń jıi órtke shalynatyn Aqmola, Qostanaı, Pavlodar, ShQO jáne Qaraǵandy oblystarynda bul jumysty belsendi júrgizý qajet. Órtti erte anyqtaý júıelerin qarjylandyrýdy ýtılalym esebinen qaıtarymdy negizde júzege asyrý múmkindigin qarastyrýdy usynamyn», — dedi Erlan Nysanbaev.
Onyń atap ótýinshe, órt kezinde jedel sheshimder qabyldaý maqsatynda mınıstrliktiń respýblıkalyq dıspetcherlik qyzmeti Astana qalasyna kóshirilip, Tótenshe jaǵdaılar mınıstrliginiń daǵdarys jaǵdaılarynda basqarý ortalyǵyna ornalastyryldy.
Kezekshilik táýlik boıy júredi.
«Mınıstrliktiń algorıtmine sáıkes, daǵdarys ortalyǵyna jáne orman mekemelerine Qazgıdrometten meteoderekter avtomatty rejımde beriledi. Osy derekter negizinde elimizdegi órt qaýipsizdigi klassy men ındeksi anyqtalady», — dedi ol.
Sonymen qatar mınıstr osy jyldyń 1 shildesinen bastap orman órti stantsııalary qyzmetkerlerine laýazymdyq jalaqydan 100 paıyz kóleminde ústemeaqy belgilengenin atap ótti.
