Órtke oranǵan avtobýstan 10 oqýshyny qutqarǵan júrgizýshi marapattaldy
ALMATY. QazAqparat - Almatyda №29 avtobýstyń órtený sebebin arnaıy komıssııa anyqtaý ústinde, dep habarlaıdy QazAqparat tilshisi.
«Green Bus» JShS dırektorynyń orynbasary Bahytjan Ryspaevtyń aıtýynsha, avtobýs jolǵa shyqpastan buryn ábden tekserilgen.
«Qorytyndysy shyqpaı, avtobýstyń órtený sebebin áli aıta almaımyn. Komıssııa tyńǵylyqty saraptama jasap jatyr. Komıssııa quramyna ártúrli qyzmet mamandary, memlekettik organ ókilderi endi. Biz endi alda mundaı jaǵdaıdy boldyrmaý úshin qaýipsizdik sharalaryn qarastyratyn bolamyz», - dedi ol.
Aıta keteıik, búgin Almaty qalasy boıynsha TJD basshysy Serik Áýbákirov atalǵan baǵdardaǵy avtobýs júrgizýshisi, 30 jastaǵy Azamat Saǵynovqa órt sóndirýshilerdi kútip turmastan, kóliktegi 10 oqýshyny qutqarǵany úshin Alǵys hat tapsyrdy.
Júrgizýshi óz sózinde órt shyqqanda sasyp qalmaǵanyn, jolaýshylardy túsirip bolǵan soń ǵana, órt sóndirý ballonymen qyzyl jalyndy aýyzdyqtaýǵa kiriskenin aıtty.
Eske sala keteıik, 6 qazan kúni Dostyq dańǵyly boıymen Býtakavkaǵa ketip bara jatqan №29 avtobýs órtenip ketti. Júrgizýshi avtobýsty toqtatyp, 10 oqýshyny alyp shyqqan. 
