Órtke deıin «Almaty Towers» nysanyn tekserýge zań jol bermegen edi - Imanqulov
ASTANA. QazAqparat - QR Іshki ister mınıstrligi Tótenshe jaǵdaılar komıtetiniń resmı ókili Rýslan Imanqulov 2016 jyldyń 6 qarashasynda órtke oranǵan "Almaty Towers" ǵımaratyn órt qaýipsizdigin tekseretin organdar nege buryn teksere almaǵandyǵyn túsindirip berdi.
QazAqparat tilshisimen əńgimelesken Rýslan Imanqulov alty adamnyń, sonyń ishinde bes stýdenttiń ómirin qıǵan bul órtte zańnamany zertteý kerek deıdi.
"Bul jerde zańnamany zertteý kerek. Mysaly, siz búgin kishigirim bir nysan ashtyńyz delik. "Almaty towers" ǵımaratynda órt bolǵan kəsipkerlik nysany da kishigirim nysanǵa jatqan. Aıta keteıin, nysannyń úlken nemese kishkene təýekeldegi kəsipkerlik ekenin jergilikti əkimdik anyqtaıdy. Təýekeli úlken nysandardy jylyna bir ret, təýekeli ortasha nysandardy bir jarym jylda bir ret, kishigirim nysandy úsh jylda bir ret teksere alamyz. Sonymen, sizdiń nysanyńyzǵa órt qaýipsizdigin tekseretin ınspektordyń kelýine deıin úsh jyl bar. Úsh jyldyń ótýine deıin bir aı qalǵan ýaqytta siz jeke kəsipkerlik nysanyńyzdyń ataýyndaǵy bir əripti ózgerttińiz delik. Mine, siz úsh jylǵa bir aı qalǵanda nysanyńyzdyń ataýynda bir əripti bolsyn ózgertseńiz, boldy, biz sizdiń nysanyńyzǵa kire almaımyz, teksere almaımyz. Taǵy da úsh jyl kútemiz. Osy "Almaty Towers" nysanynda da sondaı jaǵdaı kezdesti. Ol jerde kəsiporyndardyń ıeleri aýysyp ketken bolatyn",-dep túsindirdi Rýslan Imanqulov.
Onyń habarlaýynsha, "Almaty Towers" nysanyndaǵy órt boıynsha tergeý əli jalǵasyp jatyr.
"Órt boıynsha tergeý əli júrip jatyr. Ol - bir. Ekinshiden, osy məsele boıynsha qate jibergen adamdy órt sóndirýshilerdiń arasynan nemese órt baqylaý organdarynyń arasynan izdeýdiń qajeti joq. Arnaıy zań bar. Ol zańnan biz attap óte almaımyz. Ózimizdiń oıymyzǵa kelgen kezde tekserý ótkize almaımyz. Órt bolǵannan keıin əýel basta negizgi sebeptiń biri - dənekerleý jumysy dep aıtyldy. Bul sebep tergeý barysynda dəleldenýi de múmkin, dəleldenbeýi de múmkin. Ol jaǵynyń núktesin tergeý qoıady. Degenmen, saraptamalardyń kóbi órttiń negizi sebebi dənekerleýmen baılanysty degenge saıady. Al, eger dənekerleý jumystarymen baılanysty bolyp tursa, sol jerde jumys istegen adamdar ózderiniń qaýipsizdik tehnıkasyn saqtamaǵan",-dep məlim etti R. Imanqulov.
