Órtenip ketti: Qyzylordada jol apatynan 20 jastaǵy jigit kóz jumdy

QYZYLORDA. KAZINFORM — Keshe Qyzylorda oblysynda adam ólimimen aıaqtalǵan jol apaty boldy.

Oqıǵa 2 aqpan kúni saǵat 13.45 shamasynda Syrdarııa aýdanynyń Shaǵan aýyly tusyndaǵy Qarabutaq–Qyzylorda–Shymkent tas jolynda tirkeldi.

Tereńózek kentinen Aqjarma aýylyna qaraı baǵyt alǵan gazben júretin «Audi 80» avtokóligi qarsy baǵytta kele jatqan Shekara qyzmeti departamentine tıesili «Ýral» qyzmettik kóligimen soqtyǵysqan. «Ýral» kóliginde júrgizýshini qosa alǵanda 23 áskerı qyzmetker bolǵan. Soqtyǵys saldarynan «Audi» avtokóligi órtenip, 20 jastaǵy júrgizýshi oqıǵa ornynda kóz jumdy. 

— Atalǵan fakt boıynsha qylmystyq kodekstiń 345-babynyń 3-bóligimen qylmystyq is qozǵaldy. Kisi ólimine ákep soqqan jol júrisi qaǵıdalaryn buzý deregi boıynsha tergeý áreketteri júrgizilip jatyr. Tergeý qorytyndysyna sáıkes tıisti protsessýaldyq sheshim qabyldanady, — dep habarlady oblystyq polıtsııa departamentiniń baspasóz qyzmeti.

Osy oraıda polıtsııa qyzmetkerleri júrgizýshilerdi jol erejesin saqtaýǵa shaqyrdy. 

Buǵan deıin Aqtóbe — Orynbor tasjolynda úsh kólik soqtyǵysyp, oqıǵa ornynda úsh jolaýshy men júrgizýshi kóz jumǵan bolatyn.