Órtenip jatqan úıinen qujattaryn alyp shyqpaq bolǵan SQO turǵyny ajal qushty
PETROPAVL. QazAqparat - Soltústik Qazaqstan oblysynyń Arhangelka eldi mekeninde órt shyǵyp, bir adam qaza tapty, dep habarlaıdy QazAqparat tilshisi.
Órt keshki segizder shamasynda shyqqan. Bul kezde úıde tek 13 jastaǵy jasóspirim ǵana bolǵan eken. Lapyldaǵan jalyndy kórgen qyz terezeni syndyryp, dalaǵa shyǵady. Qyzynyń aıqaıyn estip jetken ákesi jalań aıaq turǵan balasyna aıaǵyndaǵy pımasyn sheship berip, ózi qujattardy qutqarýǵa úıge kirip ketken. Sodan qaıtyp shyqpapty.
«Ákesi órtti sóndiremin, qujattardy alyp shyǵamyn dep janyp jatqan úıge kirgen. Biraq aýa jetpeı, qaıta dalaǵa shyǵa almaı qalǵan. Órt sóndirýshiler kelgenshe deıin gaz ballony jarylypty», - deıdi SQO TJ departamenti bastyǵynyń orynbasary Nurlan Atyǵaev.
Mamandardyń aldyn ala boljamy boıynsha órt - gaz ballonynyń durys ornatylmaýynan shyǵýy múmkin. Marqumnyń sońynda 3 balasy qaldy.
