Órtenip jatqan «Haziret Sultan» meshitinen qutqarýshylar 13 adamdy aman alyp shyqty
ASTANA. 15 qańtar. QazAqparat /Marlan Jıembaı/ - Elordanyń órtke qarsy qyzmetiniń mamandary órtenip jatqan «Haziret Sultan» meshitinen 13 adamdy aman-esen alyp shyqty, dep málim etti QazAqparat tilshisine Astana qalalyq Tótenshe jaǵdaılar departamentiniń baspasóz qyzmetinen.
«Tótenshe oqıǵa ornynda 35 tehnıka jumys isteýde. Órtke qarsy qyzmet mamandarymyz 13 adamdy qutqardy. Olarǵa qazir medıtsınalyq kómek kórsetilýde», - dedi vedomstvo baspasóz qyzmetiniń mamany Bıbıgúl Esmaǵambetova.
Onyń atap ótýinshe, órttiń shyǵý sebebi men taralý aýmaǵy naqtylaný ústinde. Qazirgi ýaqyttaǵy jaǵdaı boıynsha, meshittegi órt aýyzdyqtalǵan joq.
Aıta keteıik, osy kúnge deıin meshittiń qurylysy 90 paıyzǵa aıaqtalyp, tek oıý-órnek, boıaý jaǵý, dekoratıvti jumystar ǵana qalǵan bolatyn. 3 qabattan turatyn meshitte neke qııý zaly, ashana, tehnıkalyq bólmeler, ımamdardyń kabınetteri ornalasatyn bolady. 5000 adamǵa eseptelgen dinı mekemeniń aýdany 18 myń sharshy metrdi quraıdy. Al nysannyń alyp jatqan jalpy aýmaǵy - 12 gektarǵa jýyq. Meshittiń kúmbezi Qazaqstan boıynsha eń úlken dep aıtýǵa bolady. Onyń dıametri 28 metrden astam. Al bıiktigi 52 metrdi quraıdy. Nysannyń 4 munarasynyń bıiktigi 77 metrge teń.
