«Qazirgi ýaqytta Fedorov aýdandyq aýrýhanasynyń patsıentteri, atap aıtqanda, otadan keıingi, júkti jáne bosanǵan áıelder, sondaı-aq erekshe baqylaýdy qajet etetinder Qostanaı oblystyq aýrýhanasyna jetkizildi. Onyń ishinde reanımatsııalyq kómek qajet etetin naýqastar da bar. Al aýrýhanadan shyǵarýǵa daıyndalyp jatqan 6 patsıent ınternatqa qonyp shyǵady», - dedi oblystyq densaýlyq saqtaý basqarmasynyń baspasóz hatshysy Ksenııa Jılkıbaeva.

Qazir Fedorov aýdanynyń jedel járdem qosalqy stantsııasyna Qostanaı qalasynyń jedel járdem brıgadasy attandy.

Eske salsaq, Qostanaı oblysynyń Fedorov aýdanynda aýrýhana órtenip jatyr.

QR TJM resmı ókili Talǵat Ýálıdiń aıtýynsha, búgin saǵat 18:28-de Qostanaı oblysynyń órtke qarsy qyzmet pýltine Fedorov aýdanynyń aýrýhanasy ǵımaratyndaǵy órt týraly shaqyrtý túsken.

«Órt sóndirýshiler oqıǵa ornyna tórt mınýttan keıin, saǵat 18:32-de jetti. Olar kelgen kezde órt 300 sharshy metr aýmaqta shatyr, tóbe jabyny jáne lıft shahtasyn jalmaǵan. Oqıǵa ornyna Qostanaı oblysy TJD jaqyn bólimsheleriniń kúshteri jumyldyryldy. Atap aıtqanda, jeti arnaıy tehnıka men jeke quramnyń 25 adamy órt aýmaǵynda jumys istep jatyr», - dep naqtylady Talǵat Ýálı.