Órtengen ormandy qalaı qalpyna keltirýge bolady-mamannyń pikiri

KÓKShETAÝ. QazAqparat - Aqmola oblysynda jalpy aýmaǵy 171 gektardy alyp jatqan 13 orman pıtomnıgi bar. Onda aǵash pen butanyń 100-den astam túri ósiriledi. Bul pıtomnıkterdiń jumysy jáne órtengen orman alqaptarynda aǵash otyrǵyzý barysy jaıynda oblystyq Tabıǵı resýrstar jáne tabıǵatty paıdalanýdy retteý basqarmasynyń Orman sharýashylyǵy jáne erekshe qorǵalatyn tabıǵı aýmaqtar bóliminiń basshysy Ádil Qantaev aıtyp berdi, dep habarlaıdy QazAqparat tilshisine.

Mamannyń aıtýynsha, aǵash otyrǵyzý sheberlikti jáne uzaq ýaqytty qajet etetin kúrdeli sharýa.

«Áýeli biz kóshetterdi pıtomnıkterde ósirip alamyz, sodan keıin ǵana aǵash retinde otyrǵyzamyz. Aǵash ol adam sııaqty. Ony kez kelgen jerge otyrǵyza berýge bolmaıdy. Ol jersinip óspeı qalýy múmkin. Mysaly, Ońtústik Qazaqstanda bizdiń kóshetter tamyr jaımaıdy, jersinbeıdi. Sol sııaqty, órtengen ormannyń aýmaǵyna da kóshet otyrǵyzýǵa da úlken sheberlik ári ýaqyt kerek. Eger órt shyǵyp, orman tolyǵymen órtenip ketse, aldymen sol jerde órtengen aǵashtardan tazartyp alý kerek. Eger órttiń aýdany úlken bolsa, zalal esepteledi, sodan keıin kúıgen aǵashttardy kesýge ruqsat beriledi. Bul aǵashtar bári kesilip alynady, al bul ýaqytty qajet etedi. Bári bolǵan soń kúıgen jerdegi topyraq óńdelip baryp, aǵash otyrǵyzylady», - dep túsindirdi Ádil Qantaev.

Ol atap ótkendeı, Memleket basshysynyń Joldaýyndaǵy bes jyl ishinde 2 mlrd astam aǵash otyrǵyzý týraly mindetterdi oryndaý baǵytynda Aqmola oblysynda 2021-2025 jyldar aralyǵynda 150 mln dúp qylqan japyraqty jáne japyraqty aǵash otyrǵyzý josparlanǵan.

«Jyl saıyn orman sharýashylyǵy mekemeleriniń 13 orman pıtomnıginde 10 mıllıonnan astam aǵash (1-2 jas) jáne buta kóshetteri (3 jastan asqan) ósiriledi»,-dep tolyqtyrdy Ádil Qantaev.

Osy rette, 2023 jyly orman pıtomnıkterindegi 47 gektar aýmaqqa 13 tonnadan astam qylqan japyraqty jáne japyraqty aǵash kóshetteri egilip, 237 tonna qaraǵaı búrshigi jınaldy. Pıtomnıkterdegi aǵash men butalardyń 100-den astam túri ósiriledi.

«Sandyqtaý aýdanynda 1976 jyly qurylǵan Maraldy orman sharýashylyǵy mekemesinde qaraǵaı, arsha, batys tıýjasy, sibir shyrshasy, qaıyń, qaraǵash, úıeńki sııaqty aǵash túrleri ósiriledi. Sonymen birge, tsınkofıl, spıreıa, gortenzııa, deren sııaqty buta túrleri bar», - deıdi Maraldy orman sharýashylyǵy mekemesi dırektorynyń orynbasary Arman Ábenov.

Kóshettiń quny, ótken jylǵy túgendeýge sáıkes, 10 teńgeni quraıdy, al kóshetterdiń baǵasy aǵashtyń túri men bıiktigine baılanysty jáne ortasha eseppen 2-den 50 myń teńgege deıin ózgeredi.

Aıta ketsek, budan buryn Aqmola oblysynda 120-dan astam adam orman órtin sóndirgenin

jazǵan edik.