Órtengen ormandaǵy aǵashtardy kesýge tyıym salynady - Myrzaxmetov
ASTANA. QazAqparat - Búgin Parlament Senatynda ótken bıoalýandylyqty saqtaý máselesi boıynsha qoǵamdyq tyńdaýlar barysynda QR Premer-mınıstriniń orynbasary - QR Aýyl sharýashylyǵy mınıstri Asqar Myrzaxmetov aldaǵy ýaqytta ormandy qasaqana órtese de, aǵash kesýge tyıym salynatynyn málimdedi, dep xabarlaıdy QazAqparat tilshisi.
"Búginde orman salasyn qoldaý jáne saýyqtyrý boıynsha birqatar sheshimder qabyldandy. Olardyń eń bastylary - bórenelerdiń eksportyna tyıym salyndy jáne sekseýil ormandarynda aǵash kesýdiń barlyq túrlerine moratorıı jarııalandy. Biraq bul sheshimder áli de bolsa jetkiliksiz ekendigine bizdiń kózimiz jetti. Sondyqtan bıyl qosymsha sheshimder qabyldanyp otyr. Aıtalyq, qylqan japyraqty ormandarda sanıtarlyq maqsatta jáne órtegen orman aǵashtaryn kesýge tyıym salý máselesi qarastyrylýda. Sebebi órt oryn alǵannan keıin ol jerde qalǵan aǵashtardyń bárin óndiriske paıdalanýǵa bolady. Sondyqtan órt oqıǵalarynyń qasaqana jasalatyny da jasyryn emes. Osyǵan baılanysty órt bolǵan kúnniń ózinde ol aǵashtardy sanıtarlyq kesýge tyıym salý týraly sheshimdi qabyldaǵaly otyrmyz", - dedi A.Myrzaxmetov.
Qoǵamdyq tyńdaýlardan keıin QazAqparat tilshisine suxbat bergen aýyl sharýashylyǵy vıtse-mınıstri Erlan Nysanbaev osy másele boıynsha túsinikteme berdi.
"Birinshiden, biz qaraǵaı ormandarynda sanıtarlyq aǵash kesýdi toqtatamyz. Osy sanıtarlyq aǵash kesýdiń ishinde órttengen ormandardy tazalaý degen másele bar. Endi, biz sol órtengen ormandardy tazalatpaımyz. Sebebi álemdik tájárıbege súıensek, jelden qulaǵan, órt shalǵan ormandarǵa tımeıdi. Tabıǵattyń ózi bárin qalpyna keltiredi. Ondaı tájirıbe Kanadada, Germanııada jáne Eýropanyń birqatar elderinde bar. Qazir osy másele boıynsha qujattar daıyn. Jaqyn arada engizetin bolamyz", - dep atap kórsetti E.Nysanbaev.
Foto: Sergeı Dýbrovın
