Órtengen ǵımaratta qalyp qoıǵan kishkentaı balany qutqarǵan eki qaraǵandylyq marapattaldy
QARAǴANDY. QazAqparat – Qaraǵandy oblysy TJD bastyǵynyń mindetin atqarýshy Aqylbek Ahmetjanov ot sharpyǵan «Kedr» monshasynan balany alyp shyqqan jas jigitterdi marapattady, dep habarlaıdy QazAqparat tilshisi.
«Órtten qutqarý kezinde kórsetken jankeshtiligi men batyldyǵy úshin Sherhan Tóleýhanov pen Jantóleý Eginbaı «Tótenshe jaǵdaıdaǵy erligi úshin» tósbelgisimen marapattaldy. Ony Qaraǵandy oblysy TJD bastyǵynyń mindetin atqarýshy Aqylbek Ahmetjanov tabystady. Ol jigitterdiń batyl is-áreketin atap ótip, tótenshe oqıǵa kezinde ózgeniń ómirine nemquraıly qaramaǵany úshin alǵysyn jetkizdi», – dep habarlady Qaraǵandy oblysy TJD baspasóz qyzmeti.
Esterińizge sala keteıik, «Kedr» monsha keshenindegi órt 29 mamyrda bolǵan edi .
Birneshe mınýt ishinde keshenniń ózi ǵana emes, sonymen qatar kórshi ornalasqan turǵyn úılerdiń sharýashylyq qurylystary, sondaı-aq jaqyn mańdaǵy avtomobılder otqa oranǵan bolatyn.
Órt shyqqan kezde ǵımaratta bolǵan Sherhan Tóleýhanov pen Jantóleý Eginbaı ǵımarattyń astyńǵy qabatynda bala qalyp qoıǵanyn baıqaǵan.
Olar balany dymqyl súlgimen jaýyp, órt sóndirýshiler kelgenge deıin jalyn arasynan kóshege shyǵaryp úlgergen.
TJD órt sóndirý bólimsheleri janyp jatqan ǵımarattan taǵy bes adamdy qutqardy.
