Órtengen ǵımarat ishinde qalǵanda ne isteý kerek - TJK keńesi
ASTANA. QazAqparat - QR ІІM TJK Órt qaýipsizdigi salasynda baqylaý jáne profılaktıkalyq qyzmet basqarmasy memlekettik órt baqylaý bóliminiń bastyǵy Rústem Ysqaqov órt shyqqan nysanda adam ózin qalaı ustaý kerektigin túsindirip berdi, dep habarlaıdy «QazAqparat» HAA tilshisi.
«Eń birinshi kezekte halyq kóp baratyn nysanda sondaı jaǵdaıǵa tap bolǵan adam evakýatsııalanýǵa bolatyn shyǵý esigin anyqtaýǵa tyrysýy kerek. Ózim de, máselen halyq kóp shoǵyrlanǵan nysanǵa barsam, eń aldymen órt sóndirýge bolatyn alǵashqy quramnyń (qurylǵylardyń - avt.) qaıda turǵanyn jáne shyǵý esigi qaıda ornalasqanyn, onyń ashyq nemese jabyq turǵanyn bilip alýǵa tyrysamyn. Buǵan erekshe nazar aýdarý kerek. Máselen, kınoteatrǵa kirgen kezde evakýtsııalanýǵa bolatyn esiktiń qaıda ornalasqanyn birden bilýge tyrysyńyz», - dep uqtyrdy Rústem Ysqaqov QR ІІM Tótenshe jaǵdaılar komıtetinde órt qaýipsizdigi salasyndaǵy memlekettik baqylaýdy júzege asyrý máseleleri jóninde ótken brıfıng barysynda.
Ol óz sózinde eger sondaı tótenshe jaǵdaıǵa tap bolsańyz, sabyr saqtaýǵa tyrysyp, naqty qaı jerde turǵanyńyzdy habarlaý kerektigin aıtty.
«Basyńyzdy edenge jaqyn ustaý kerek. Sebebi, órtten kóterilgen tútin joǵaryǵa kóterilip, demalatyn aýa eden deńgeıinde saqtalady. Múmkindik bolsa, aýzyńyzdy sýlanǵan shúberekpen jaýyp, evakýatsııalaný jaǵyna jaqyndaǵanyńyz jón», - deıdi ol.
Sonymen qatar, ІІM TJK ókili ondaı jaǵdaıda kez kelgen adam óziniń azamattyq jaýapkershiligin sezinýi kerektigin qadap aıtty.
«Órt sóndirý qurylǵysyn qalaı qoldaný kerektigin bilseńiz, eń aldymen sony paıdalanyp tilsiz jaýdy aýyzdyqtaǵan abzal. Eń birinshi kezekte, azamattyq jaýapkershilikti sezinip, evakýatsııa jolyn anyqtaýǵa tyrysý kerek», - dep túıdi Rústem Ysqaqov.
Foto: checkmate.net.au
