Órtengen ferroqorytpa zaýytyndaǵylar qutqarýshylardy kirgizbeýge tyrysyp baqty — TJM

ASTANA. KAZINFORM — Tótenshe jaǵdaılar vıtse-mınıstri Baýyrjan Syzdyqov ferroqorytpa zaýytyndaǵy apat týraly habar qutqarýshylarǵa 2 saǵattan keıin ǵana túskenin málim etti.

«Qaraǵandy ferroqorytpa zaýytyndaǵy apat týraly málimet Tótenshe jaǵdaılar mınıstrligine qaı ýaqytta tústi?» dep surady BAQ ókili úkimet otyrysynan keıin ótken baspasóz máslıhatynda.

Vıtse-mınıstr zaýyttaǵylar apat týraly habardy 2 saǵat keshiktirip bergenin aıtady.

«Bul jerde negizi oqıǵa tańǵy saǵat 4:10 kezinde bolǵan. Biraq, ókinishke qaraı, ol habar bizge 6-dan 8 mınýt ketkende túsken. Demek, bylaı aıtqanda, 2 saǵattan keıin túsip otyr. Ol bizdiń azamattyq qorǵaý salasyndaǵy zańnamaǵa qaıshy keledi. Bizdiń kúsh-quraldar ol jerge sanaýly mınýttarda jetti. Biraq, ókinishke qaraı, sol mekemeniń qyzmetkerleri bizdiń qutqarýshylardy ol jerge kirgizbeýge tyrysqan. Sondyqtan olarǵa qazir ákimshilik shara qoldanylyp jatyr, ákimshilik is qozǵaldy.Bul jerde aıta ketetin nárse, Qazaqstan aýmaǵynda ornalasqan mekemelerdiń bári tótenshe jaǵdaı bolǵan kezde óziniń aýmaǵyna qutqarý kúsh-quraldaryn kirgizýge mindetti. Sondyqtan ol mekemege 200 aılyq eseptik kórsetkish kóleminde aıyppul salynady. Qazir is sotqa ótti», — dedi Baýyrjan Syzdyqov.