Órtengen avtobýstyń júrgizýshileri 24 naýryzǵa deıin qamaýda bolady
AQTÓBE. QazAqparat - Aqtóbede órtengen avtobýstyń úsh júrgizýshisi eki aı boıy ýaqytsha tergeý ızolıatorynda otyrady. Búgin Nurjan Qyrǵyzbaev, Maqsat Pernebekov, Barat Tańatovtarǵa qatysty bultartpaý sharasyn sot sanktsııalady, dep habarlaıdy QazAqparat tilshisi.
Aqtóbedegi avtobýs órti kezinde 52 adam qaza bolyp, 5 adam túrli jaraqatpen aýrýhanada em qabyldady. Buǵan deıin habarlaǵanymyzdaı, úsh júrgizýshi aýrýhanadan shyǵarylyp, tergeý júrgizilgen bolatyn. Al búgin №2 qalalyq sotynda aldymen júrgizýshi Nurjan Qyrǵyzbaev 2 aıǵa ýaqytsha tergeý ızolıatoryna qamaldy. Sanktsııaǵa júrgizýshi Maqsat Pernebekovtyń týǵan-týystary arnaıy keldi. Olar aýrýhanada kezdese almaǵan, qaıǵyly oqıǵadan keıin Maqsat Pernebekovti kórmegen.
«Biz Aqtóbege búgin keldik. Іnimizben kezdesý múmkin bolmady. Men ony kináli dep eseptemeımin», - dedi Gúlshat Pernebekova.
Sýdıa Alıma Adılova júrgizýshiler Maqsat Pernebekov pen Barat Tańatovty da eki aı merzimge kúzetpen ustaý týraly bultartpaý sharasyn sanktsııalady. Júrgizýshilerdiń bári tergeý jumystary aıaqtalǵansha ızolıatorda otyrady. 
