Ortasha jyldamdyqty qadaǵalaý júıesi avtojoldardyń taǵy 18 ýchaskesinde keńeıtiledi
ASTANA. KAZINFORM – Kólik mınıstrligi ІІM-men birlesip jol-kólik oqıǵalarynyń aldyn alýǵa, aýyr saldaryn tómendetýge jáne qaýipsiz jol qozǵalysyn qalyptastyrýǵa baǵyttalǵan júıeli sharalar keshenin júzege asyrýda. Bul týraly Úkimettiń baspasóz qyzmeti habarlady.
Premer-mınıstr Oljas Bektenovtiń tóraǵalyǵymen ótken quqyq buzýshylyq profılaktıkasy jónindegi Vedomstvoaralyq komıssııada jol ınfraqurylymynyń qaýipsizdigin qamtamasyz etý jáne jańǵyrtýdyń negizgi quraldary týraly kólik mınıstri Nurlan Saýranbaev baıandady.
Qazaqstanda 5 jyl ishinde 11 myń shaqyrym jol jańǵyrtyldy, bul elimizdegi jol jelileriniń jalpy uzyndyǵynyń 45%-y. Ýchaskelerdi I jáne II tehnıkalyq sanattarǵa aýystyrý qarama-qarsy baǵyttardy bólý jáne júrý bóligin keńeıtý esebinen qaýipsizdik deńgeıin arttyrǵa múmkindik berdi. Jaıaý júrginshilerdiń qaýipsizdigin qamtamasyz etý jáne tranzıttik kólikter eldi mekenderge soqpaýy úshin 65 aınalma jol jáne 38 jerústi jaıaý júrginshiler ótkeli salyndy. Keshendi jospar aıasynda jyl saıyn 8 myńnan astam jol belgileri men tańbalary jańartylyp otyrady.
— Jol-kólik oqıǵalarynyń negizgi sebebi — jyldamdyqtyń artýy bolyp qalyp otyrǵandyǵy eskerilip, jyldamdyq rejımin baqylaý quraldaryna erekshe nazar aýdarylýda. Búgingi tańda ortasha jyldamdyqty qadaǵalaý júıesi jalpy uzyndyǵy 2 myń shaqyrym bolatyn eń qarqyndy 8 aqyly ýchaskede engizildi, bul shara JKO sanyn 15%-ǵa tómendetýge múmkindik berdi. Osy oń áserdi eskere otyryp, bıylǵy mamyr aıynyń sońyna deıin uzyndyǵy 2,9 myń shaqyrym bolatyn taǵy 18 ýchaskede júıeni keńeıtý josparlanyp otyr, — dep atap ótti mınıstr.
Aıta ketelik Úkimet joldaǵy qaýipsizdik sharalaryn kúsheıtýdi tapsyrǵan edi.
