Ortasha jyldamdyqty baqylaý júıesin engizgennen keıin jol-kólik oqıǵalary 8%-ǵa azaıdy

ASTANA. KAZINFORM – Halyqaralyq jáne respýblıkalyq mańyzy bar avtomobıl joldarynda ortasha jyldamdyqty tirkeý júıesi 2025 jyldyń kókteminen bastap iske qosyldy. 

17 naýryzdan bastap joldardyń túzý ýchaskelerinde arnaıy kameralar jumys istep, olar júrgen qashyqtyqty júrip ótken ýaqytqa bólý arqyly júrgizýshiniń ortasha jyldamdyǵyn esepteı bastady.

- 17 naýryzdan 24 sáýirge deıingi aralyqta júrgizilgen taldaýdyń nátıjesi boıynsha kameralar ornatylǵan jol ýchaskelerinde jol-kólik oqıǵalarynyń sany ótken jyldyń osy kezeńimen salystyrǵanda 8%-ǵa tómendegeni anyqtaldy. Sonymen qatar, jaraqat alǵandardyń sany 29%-ǵa azaıdy. Bul jol qozǵalysy qaýipsizdiginiń artqanyn kórsetedi, - dep jazdy QazAvtoJoldan.

Ortasha jyldamdyqty baqylaý júıesi júrgizýshilerdiń tártibine oń áserin tıgizýde: olar belgilengen jyldamdyqty jıi saqtap, jol-kólik oqıǵalarynyń táýekelin aıtarlyqtaı tómendetýde. Sonyń nátıjesinde joldardaǵy jaraqattaný deńgeıi azaıýda.

Esterińizge sala óteıik, ortasha jyldamdyq kelesi jol ýchaskelerinde baqylanady: Astana – Şýchınsk (jyldamdyq shekteýi 140 km/saǵ); Astana – Pavlodar (jyldamdyq shekteýi 140 km/saǵ); Shymkent – Qyzylorda (jyldamdyq shekteýi 110 km/saǵ); Shymkent – Taraz (jyldamdyq shekteýi 110 km/saǵ); Pavlodar – Semeı – Qalbataý (jyldamdyq shekteýi 100–110 km/saǵ); Oral – Reseı shekarasy (Saratov baǵyty) (jyldamdyq shekteýi 100 km/saǵ); Pavlodar – Reseı shekarasy (Omby baǵyty) (jyldamdyq shekteýi 100–110 km/saǵ).

- Búgin de atalǵan sharalar óz tıimdiligin kórsetip, eldiń negizgi avtojoldarynda qozǵalys qaýipsizdigin arttyrýǵa yqpal etýde, - delingen aqparatta.

Aıta keteıik, Qyzylordada jyldamdyq rejımin 17 ret buzǵan júrgizýshi anyqtaldy.