Ortasha jyldamdyqty baqylaý júıesi bar avtojoldardyń sany artty
ASTANA. KAZINFORM — 13 qazannan bastap Qazaqstannyń taǵy tórt aqyly avtojolynda ortasha jyldamdyqty asyrý derekteri tirkele bastaıdy. Bul turǵyda endi osyndaı júıe elimizdiń 15 jol ýchaskesinde jyldamdyqty ólsheıdi.
- «QazAvtoJol» UK» AQ baqylaý júıesin keńeıtip, oǵan jańa baǵyttardy qosady. Osy oraıda ortasha jyldamdyq baqylanatyn aqyly jol bólikteriniń sany 11-den 15-ke deıin artady. Búginnen bastap ortasha jyldamdyq myna baǵyttarda baqylanady: Oral – RF shekarasy (Samara), Aqtóbe – RF shekarasy (Orynbor), Qostanaı – Denısovka, Qandyaǵash – Maqat. Atalǵan joldarda baqylaý qurylǵylary ornatylǵan arkalardyń araqashyqtyǵy ólshenip, apparattyq-baǵdarlamalyq keshender sertıfıkattaýdan ótti. Júıe ortasha jyldamdyqty asyrý derekterin tirkep, tıisti málimetterdi Ákimshilik is júrgizýdiń biryńǵaı tiziliminiń (ÁІJBT) protsessıng ortalyǵyna joldaıdy, - dep atalyp ótken kompanııa aqparatynda.
Eske salsaq, Qazaqstannyń respýblıkalyq avtojoldarynda ortasha jyldamdyqty baqylaý júıesi 2025 jylǵy 17 naýryzdan beri jumys istep keledi. Osy ýaqytqa deıin jalpy uzyndyǵy 3 myń shaqyrymǵa jýyq 11 aqyly jol bóliginde baqylaý júrgizilip otyr.
Olar: Astana – Şýchınsk; Astana – Pavlodar; Astana – Temirtaý; Shymkent – Qyzylorda; Shymkent – Taraz; Pavlodar – Semeı – Qalbataý; Oral – RF shekarasy (Saratov); Pavlodar – RF shekarasy (Omby); Almaty – Qorǵas; Kókshetaý – Petropavl; Aqtóbe – Qandyaǵash.
Jyldamdyq tártibin buzýdyń 700 myńnan astam deregi tirkeldi
2026 jyldyń basynan beri respýblıkalyq avtojoldarda ortasha jyldamdyqty asyrýdyń 550 myń, al belgilengen núktedegi jyldamdyqty asyrýdyń 163,5 myń deregi tirkelgen. Jalpy jyldamdyqty asyrýǵa qatysty 713 myńnan astam quqyq buzý deregi anyqtaldy.
Jol boıyndaǵy kameralar avtokóliktiń baqylaý arkalarynan ótken ýaqytyn tirkeıdi. Júıe osy ýaqyt pen eki arkanyń araqashyqtyǵyn eseptep, kóliktiń ortasha jyldamdyǵyn anyqtaıdy. Sondyqtan kameraǵa jaqyndaǵanda ǵana jyldamdyqty tómendetý júrgizýshini jaýapkershilikten bosatpaıdy. Eger kólik baqylaýdaǵy jol bóligin ruqsat etilgen ortasha jyldamdyqtan asyryp ótse, jyldamdyq erejesin buzý deregi tirkeledi.
- Baqylaý júıesin keńeıtýdegi basty maqsat – jol qozǵalysynyń qaýipsizdigin arttyrý, júrgizýshilerdiń jyldamdyqty shamadan tys asyrýynyń aldyn alý jáne jol-kólik oqıǵalarynyń qaýpin azaıtý. «QazAvtoJol» UK» AQ úshin bul tehnologııany engizýdegi negizgi mindet – aıyppul sanyn kóbeıtý emes, júrgizýshilerdiń joldaǵy jaýapkershiligin arttyryp, respýblıkalyq avtojoldarda qaýipsiz qozǵalysty qamtamasyz etý, - delingen atalǵan kompanııanyń málimetinde.
Aıta keteıik, jaqynda Іshki ister mınıstri Erjan Sádenov respýblıkalyq joldarda ortasha jyldamdyqty baqylaý júıesi 16 ýchaskede ornatylatynyn málim etti.
Respýblıkalyq trassalarda ortasha jyldamdyqty baqylaý júıesi ornatylǵan ýchaskelerde jol-kólik oqıǵalary sany 10 paıyzǵa, qaza tapqandar 33 paıyzǵa, jaraqat alǵandar 12 paıyzǵa azaıdy
— Búginde bul júıe uzyndyǵy 2 800 shaqyrymdy quraıtyn 12 ýchaskede bar. Jyl sońyna deıin Kólik mınıstrligimen birge taǵy 16 ýchaskede ornatamyz. Osylaısha, ortasha jyldamdyqty ólsheıtin quraldar barlyǵy 5 600 shaqyrym bolatyn 28 ýchaskede jyl aıaǵyna deıin ornatylatyn bolady. Kelesi jyldan bastap bul jumysty ári qaraı jalǵastyramyz, — dedi Erjan Sádenov.
Sonymen qatar Іshki ister mınıstriniń orynbasary Igor Lepeha elimizdiń joldaryndaǵy qaýipsizdikti qadaǵalaıtyn drondarǵa qatysty túsinik bergen edi.
- Bul rette avtoparkimiz de ósip keledi. Qazirgi tańda bizde 6 mln 100 myń kólik bar. Sońǵy bes jylda olardyń sany 1 mıllıonnan astamǵa artty. Halyqaralyq kólik aǵyny da aıtarlyqtaı ósti, — dedi mınıstr orynbasary.
Qazirgi ýaqytta «QazAvtoJol» kameralardy is júzinde árbir shaqyrym saıyn ornatyp jatyr. Demek, kameralar joldaǵy jaǵdaıdy is júzinde ár shaqyrym saıyn baqylap otyrady. Munan bólek, 500 mobıldi keshen bar. Olar jyldamdyqty ólsheıdi jáne jol qozǵalysy erejelerin buzýdyń basqa da derekterin anyqtaıdy.
— Kólikpen kele jatqanda aldyńyzdan osyndaı kesheni bar kólik kezdesýi múmkin. Ol toqtatpaıdy, biraq siz jasaǵan quqyq buzý faktisin tirkeıdi. Joldarda drondardy qoldana bastadyq. Qazirgi kezde joldarda shamamen 300 dron paıdalanylady. Ol qarsy jolaqqa shyǵý, basqa kóliktiń aldynan kesip ótý, basyp ozý jáne basqa da osyndaı derekterdi anyqtaýǵa múmkindik beredi, — dedi Igor Lepeha.
