Ortalyq Qazaqstan men «Indýstrıalnaıa Karaganda» gazetteri jańa formatqa kóshti

QARAǴANDY. QazAqparat - Qaraǵandy oblystyq «Ortalyq Qazaqstan» jáne «Indýstrıalnaıa Karaganda» gazetteri jańa formatqa kóshti. 90 jyldyǵyna qadam basqan qos gazettiń 2021 jylǵy alǵashqy sany D2 formatynda jaryq kórdi, dep habarlaıdy QazAqparat óńir basshysynyń resmı saıtyna silteme jasap.

1931 jyly jaryq kórgen qos gazet toqsan jyl boıy óńirdegi ózekti máselelerdi tereń saraptap, jurtshylyqty jan-jaqty aqparatpen qamtamasyz etip keledi. Ótken jyldan beri atalǵan basylymdar «Saryarqa Aqparat» medıaholdınginiń quramyna qosylǵan bolatyn. Búgingi kúni gazetterdiń aqparat alańyndaǵy básekege qabilettiligin arttyrý maqsatynda birqatar jobalar qolǵa alynyp jatyr. Sonyń biri - zaman talabyna saı jáne oqyrmanǵa ońtaıly jańa formatqa kóshý.

Álemdegi irgeli basylymdar, sonymen qatar elimizdegi respýblıkalyq basylymdardyń deni qazir osy D2 formatynda jaryq kóredi. Ol dástúrli A2 formatynan yqsham.

Aıta ketý kerek, gazetterdiń formaty ǵana emes, dızaıny men mazmuny da ózgerdi. Jańa jobalar men aıdarlar ashylyp, oqyrmannyń ártúrli toptarynyń suranysy zerttelip, soǵan saı tyń taqyryptar qolǵa alynbaq.

- Jańa formatqa kósher aldynda zamanaýı talaptardy, irgeli basylymdardyń tájirıbelerin zerdeledik. Sonymen qatar, ekonomıkalyq turǵydan artyq shyǵyn ákelmeıtinin kórip otyrmyz. Gazet yqshamdalady, mazmuny men bet-beınesi ózgeredi. Taldaý men saraptamaǵa basa nazar aýdaramyz. Alaıda, baıypty basylym, senimdi derekkózi retinde toqsan jyl boıy qalyptasqan ıgi dástúrlerin saqtaı otyryp, damıtyn bolady, - deıdi Saryarqa Aqparat medıaholdınginiń dırektory Qambar Ahmet.

Sonymen birge oblystyq gazetter oqyrman qataryn arttyrýǵa ınternet pen áleýmettik jelini qoldaný isin odan ári damytýdy kózdeıdi. Osy maqsatta gazetterdiń ınternet resýrsyn tehnıkalyq-dızaındyq turǵydan jańǵyrtyp, mýltımedııalyq múmkindikterin keńeıtý josparlanyp otyr.