Ortalyqtan jergilikti organdarǵa quqyqtar berýdi kózdeıtin basqarýdy ortalyqsyzdandyrýdy saýatty júrgizý qajet -Senat Tóraǵasy
ASTANA. 29 naýryz. QazAqparat - Búgin QR Parlamenti Senatynyń Tóraǵasy Qaırat Mámı oblystardyń, Astana jáne Almaty qalalary máslıhattarynyń hatshylarymen kezdesti,
dep habarlady Senattyń baspasóz qyzmetinen.
Máslıhat ókilderi memlekettik basqarýdy ortalyqsyzdandyrý jáne jergilikti ózin-ózi basqarýdy damytý máselelerin talqylaý úshin ótkizilgen semınar-keńes aıasynda Parlamentke kelgen bolatyn.
«Aǵymdaǵy jyl - Memleket basshysy N.Á.Nazarbaev jarııa etken jańa asa aýqymdy baǵdarlama - «Qazaqstan-2050» strategııasyn iske asyrýdyń alǵashqy jyly», - dep atap ótti Q.Mámı. Tóraǵa ortalyqtan jergilikti organdarǵa quqyqtar men qajetti resýrstardy berýdi kózdeıtin basqarýdy ortalyqsyzdandyrýdy saýatty júrgizý qajettigine nazar aýdardy. Taıaý ýaqytta memlekettik organdar arasyndaǵy ókilettikterdi naqty ajyratýǵa, jergilikti atqarýshy organdardy qajetti ókilettermen nyǵaıtýǵa baǵyttalǵan zańdar qabyldanatyn bolady. Prezıdenttiń sheshimi boıynsha bıyl aýyl ákimderi máslıhattar arqyly saılanatyn bolady, dep atap ótti Senat Tóraǵasy.
Degenmen, jergilikti ózin-ózi basqarýdaǵy turǵyndardyń konstıtýtsııalyq quqyqtaryn tabysty júzege asyrýy tek qajetti zańnamalyq bazanyń bolýyna ǵana emes, halyqtyń jergilikti ózin-ózi basqarýdy iske asyrý quqyqtary men múmkindikterin túsinýine de qatysty. «Halyq arasynda túsindirý jumystaryn júrgizýdiń jáne jergilikti mańyzy bar máselelerdi sheshýge azamattardyń belsendi qatysýynyń róli óte mańyzdy bolmaq», - dep atap ótti Qaırat Mámı.
Semınarǵa qatysýshylar Parlamenttiń qazirgi kezdegi zań shyǵarý qyzmetimen, Senattyń turaqty komıtetteriniń, sondaı-aq Senat janyndaǵy Jergilikti ókildi organdarmen (máslıhattarmen) ózara is-qımyl keńesiniń jumystarymen tanysty.
