Ortalyqtan óńirlerge tıisti shtat sany bólinip, jergilikti deńgeıge qosymsha ókilettikter beriledi - Májilis
ASTANA. 24 sáýir. QazAqparat - Búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine memlekettik basqarý organdary arasyndaǵy ókilettikterdiń arajigin ajyratý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.
Memleket basshysy byltyrǵy Joldaýynda 2013 jyly ortalyq jáne óńirler arasyndaǵy jaýapkershiliktiń jáne ókilettikterdiń arajigin ajyratý boıynsha naqty sharalar qabyldaý, jergilikti atqarýshy organdardy kúsheıtýdi tapsyrǵan bolatyn. Osyǵan oraı, zań jobasynda qosarlanýshylyqty boldyrmaýǵa, sondaı-aq jekelegen ókilettikterdi ortalyqtan óńirlerge, ıaǵnı halyqqa jáne bızneske jaqyndatýǵa múmkindik beredi. Tıisinshe, ortalyqtan óńirlerge tıisti shtat sanyn qaıta bólý, jergilikti deńgeıge qosymsha ókilettikter berýdi qamtamasyz etý qarastyrylatyn bolady. Memlekettik basqarýdyń jergilikti deńgeıin qajetti bıýdjettik qarajattarymen jáne shtat sanymen nyǵaıtý josparlanady, sondaı-aq jergilikti memlekettik basqarýdyń úlgilik qurylymy qaıta qaralatyn bolady.
«Jalpy alǵanda memlekettik basqarý deńgeıinen óńirlik deńgeıdegi jergilikti atqarýshy organdarǵa 61 fýnktsııa beriletin bolady. Olar myna salalardy qamtıdy: kólik jáne kommýnıkatsııa, ındýstrııa jáne jańa tehnologııalar, qurylys, turǵyn úı-kommýnaldyq sharýashylyq, din isteri, áleýmettik kómekter, aýyl sharýashylyǵy, qoǵamdyq qaýipsizdik, kóliktik baqylaý, tótenshe jaǵdaılardyń aldyn alý jáne eskertý, jer qatynastary. Bul fýnktsııalar respýblıkadan oblystarǵa bólinedi, odan ári oblystan aýdan, qalalarǵa, sosyn aýyldar men aýyldyq okrýgterge beriledi», - dedi Ekonomıka jáne bıýdjettik josparlaý mınıstri Erbolat Dosaev.
Toqtala ketetin jaıt, zań jobasyn iske asyrý sheńberinde ortalyqtan óńirlerge memlekettik basqarýdyń jergilikti deńgeıin jáne beriletin ókiletterdi nyǵaıtýǵa 4 myńnan astam shtat birlikteri beriletin bolady. Budan basqa, ortalyq memlekettik organdardyń jekelegen aýmaqtyq bólimsheleriniń ákimdikteriniń qyzmetin qaıtalaıtyn fýnktsııalardy alyp tastaý, sondaı-aq ortalyq memlekettik organdardyń birqatar quzyretterin memlekettik basqarýdyń jergilikti deńgeılerine berý qarastyrylǵan.
Atap aıtqanda, oblystardyń, respýblıkalyq mańyzy bar qalanyń, astananyń jergilikti atqarýshy organdarynyń Jumyldyrý daıyndyǵy jáne tótenshe jaǵdaılar basqarmalaryn taratý josparlanady. Olardyń azamattyq qorǵanys, apattar men dúleı apattardyń aldyn alýdy jáne joıý fýnktsııalaryn oryndaýdy oblystardaǵy, respýblıkalyq mańyzy bar qaladaǵy, astanadaǵy Tótenshe jaǵdaılar mınıstrliginiń Tótenshe jaǵdaılar departamentterine júkteý usynylady. Bul shara Tótenshe jaǵdaılar mınıstrligi men oblystardyń, Astana jáne Almaty qalalarynyń jergilikti atqarýshy organdarynyń arasyndaǵy qoldanystaǵy parallelızmdi joıýǵa múmkindik beredi.
Jalpy alǵanda zań jobasyn iske asyrý laýazymdy tulǵalardyń jaýapkershiligin kúsheıtýge, óńirlik deńgeıde memlekettik basqarý sapasyn joǵarylatýǵa múmkindik beredi. Budan bólek, demokratııa prızmasy arqyly jergilikti mańyzy bar máselelerdi sheshýde azamattardyń róli men qatysý múmkindikterin eleýli arttyratyn bolady.
