Ortalyq jylý jelisine óz betinshe qosylǵan azamattarǵa aıyppul salynady
ASTANA. QazAqparat – Ortalyqtandyrylǵan jylý jelilerine óz betinshe qosylǵan jeke tulǵalarǵa endi 172 myń teńge aıyppul salynýy múmkin. Bul týraly Májilistiń qaraýyna engizilgen «QR Ákimshilik quqyq buzýshylyq týraly kodeksine ózgerister men tolyqtyrýlar engizý týraly» zań jobasynda jazylǵan, dep habarlaıdy QazAqparat tilshisi.
Depýtattardyń talqylaýyna berilgen qujatta Ákimshilik kodekske «Jylýmen jabdyqtaý júıeleriniń jylý júıelerine óz betinshe qosylý» týraly 309-1-babyn engizý usynylǵan.
«Jalpyǵa ortaq paıdalanylatyn ortalyqtańdyrylǵan jylýmen jabdyqtaý júılerine óz betinshe qosylǵan jeke tulǵalarǵa - 50, kásipkerlik sýbektileri bolyp tabylmaıtyn zańdy tulǵalarǵa jáne shaǵyn kásipkerlik sýbektilerine – 100, orta kásipkerlik sýbektilerine – 200, iri kásipkerlik sýbektilerine – 500 AEKmólsherinde aıyppul salynady.
Ákimshilik jaza qoldanylǵannan keıin bir jyl ishinde qaıtalap jasalǵan is-áreket úshin jeke tulǵalarǵa – 100, kásipkerlik sýbektileri bolyp tabylmaıtyn zańdy tulǵalarǵa jáne shaǵyn kásipkerlik sýbektilerine – 200, orta kásipkerlik sýbektilerine – 500, iri kásipkerlik sýbektilerine – 1 000 AEK mólsherinde aıyppul salýǵa ákep soǵady», - delingen jańa bapta.
Eske salaıyq, buǵan deıin elektr stantsııalary men qazandyqtarda otyn qorynyń jetkiliksizdiginen tótenshe jaǵdaı týyndasa nemese isten shyǵý bolsa, mekeme basshylyǵyna 345 myńnan – 6,9 mln teńgege deıin aıyppul salynatynyn jazyp edik.
