Ortalyq Japonııada Ontake janartaýy oıandy
ASTANA. QazAqparat - Japonııada janartaý mańyndaǵy irgeles aýdandardyń turǵyndary tańerteń Ontakede birneshe jarylys bolyp, taý jynystarynyń atqylaǵany jaıly habarlady, dep jazady ITAR-TASS.
Nagano prefektýrasynda Ontake janartaýy búgin tańerteń atqylaı bastady. Japonııa Ulttyq meteorologııalyq basqarmasy janartaý aımaǵyndaǵy qaýip deńgeıin bes baldyq shkala boıynsha úshke baǵalap, oǵan 4 shaqyrymǵa deıingi qashyqtyqtan jaqyndaýǵa tyıym saldy. Japonııanyń NHK ortalyq telearnasy taratqan aqparatqa qaraǵanda, krater ústinen bıiktigi birneshe shaqyrym bolatyn kúl aralas shań-tozań kóterilip keledi. Zardap shekkender men qırandylar jaıly habarlama túsken joq. Ontake janartaýy Tokıodan shamamen 200 shaqyrym jerde ornalasqan. Sońǵy ret ol 2007 jyly atqylaǵan.
