Ortalyq saılaý komıssııasynda múgedekterdiń saılaý quqyqtary talqylandy

ASTANA. QazAqparat - Búgin QR Ortalyq saılaý komıssııasy EQYU-nyń Astanadaǵy baǵdarlamalar keńsesimen birge «Qazaqstan Respýblıkasyndaǵy múmkindikteri shekteýli azamattardyń saılaý quqyǵyn júzege asyrý máseleleri: qazaqstandyq jáne halyqaralyq tájirıbe» atty dóńgelek ústel ótkizdi, dep habarlaıdy QazAqparat.

QR Ortalyq saılaý komıssııasynyń tóraǵasy Berik Imashev elimizdiń Konstıtýtsııasyna sáıkes árbir azamatqa saılaý jáne saılaný quqyǵyna kepildik beriletindigin atap ótti. Bul rette saılaý organdary múmkindikteri shekteýli azamattardyń saılaý protsessterine tolyqqandy qatysýlaryn qamtamasyz etýi tıis. Atap ótilgendeı, munan bólek, Ortalyq saılaý komıssııasy múmkindigi shekteýli azamattardyń saılaý quqyqtaryn júzege asyrý jáne ol úshin arnaıy jaǵdaılar jasaý maqsatynda qyzyǵýshylyq tanytqan memlekettik jáne memlekettik emes uıymdarǵa metodıkalyq, úılestirýshilik kómek kórsetýge is-sharalar jıyntyǵy júzege asyrylatyn bolady.

Shara barysynda EQYU Astanadaǵy baǵdarlamalar keńsesiniń basshysy D.Sabo, QR Ortsaılaýkom múshesi L.Súleımen, QR Eńbek jáne halyqty áleýmettik qorǵaý vıtse-mınıstri S.Jaqypova, QR Parlamenti Májilisiniń depýtaty, «Qazaqstan múgedekter konfederatsııasy» RQB prezıdenti J.Omarbekova, EQYU/DIAQB-nyń saılaý máseleleri jónindegi sarapshysy P.Kabachenko, «Shyraq» múgedek áıelder qaýymdastyǵy» QB-nyń tóraıymy L.Qaltaeva sóz sóıledi.

Dóńgelek ústel otyrysy barysynda múgedekterdiń saılaý quqyqtaryn júzege asyrýdaǵy jańa múmkindikteri, onyń ishinde saılaý ýchaskelerin jáne ǵımarattaryn jabdyqtaý kezinde múmkindigi shekteýli azamattarǵa qolaıly jaǵdaı jasaý sharalary talqylandy.