Ortalyq saılaý komıssııasy úsh kandıdatty tirkeýden bas tartty
Baqyt Jańabaev úmitkerlerdi tirkeýdiń sońǵy sátinde qujat tapsyrǵan bolatyn. Onyń kandıdatýrasyn «Qazaqstan áýesqoı fýtbolshylarynyń» qoǵamdyq birlestigi usynǵan.
«Aýmaqtyq saılaý komıssııalarynyń hattamalaryna sáıkes, qoldaýǵa 58 889 qol jınaldy, tekserý nátıjeleri boıynsha 4 054 qol tanyldy. Bul saılaýshylardyń jalpy sanynyń 1%-dan azyn quraıdy. Osylaısha, «Saılaý týraly» Konstıtýtsııalyq zańnyń 56-baby 2-tarmaǵynyń kandıdatty qoldaýǵa saılaýshylar qolynyń qajetti sany týraly talaby oryndalmady», - dedi Ortalyq saılaý komıssııasynyń múshesi Sábıla Mustafına otyrys barysynda.
Sonymen birge, OSK múshesi Shavkat Ótemisovtyń aıtýynsha, Nurjan Áltaev 2022 jyly 6 qazanda «Muqalmas» respýblıkalyq qoǵamdyq birlestiginen kandıdat retinde usynyldy. Kandıdattyń zańnama talaptaryna sáıkestigin anyqtaý úshin tıisti memlekettik organdardan málimetter, sondaı-aq lıngvıstıkalyq komıssııa qorytyndysy alyndy.
«2022 jylǵy 11 qazanda OSK-ǵa «Muqalmas» respýblıkalyq qoǵamdyq birlestiginiń jalpy otyrysynyń QR Prezıdenttigine kandıdat usyný jónindegi 2022 jylǵy 6 qazandaǵy №19 hattamasynyń qoldanylýyn sot sheshimi zańdy kúshine engenshe toqtatý týraly Astana qalasy Baıqońyr aýdandyq sotynyń 2022 jylǵy 11 qazandaǵy dereý oryndaýdy talap etetin uıǵarymy kelip tústi. Ortalyq saılaý komıssııasynda «QR Saılaý týraly» Konstıtýıalyq zańynyń 54-baby 2-tarmaǵy negizinde Prezıdenttikke kandıdattyń Konstıtýtsııada jáne «QR Saılaý týraly» konstıtýtsııalyq zańda oǵan qoıatyn talaptarǵa sáıkestigin, onyń ishinde kandıdatty usyný týraly respýblıkalyq qoǵamdyq birlestiktiń joǵarǵy organ otyrysynyń hattamasynan úzindi kóshirme negizinde belgileý ókilettigi berilgen», - dedi Sh. Ótemisov.
Ortalyq saılaý komıssııasy sottyń uıǵarymyn oryndaı otyryp, 2022 jylǵy 12 qazanda «QR Saılaý týraly» konstıtýtsııalyq zańynyń 12-babynyń 17-tarmaqshasyn basshylyqqa ala otyryp, Prezıdenttikke kandıdat N. Áltaevtyń sáıkestigin belgileý rásimin toqtata turǵan bolatyn.
«Muqalmas» respýblıkalyq qoǵamdyq birlestiginiń joǵary organynyń 2022 jylǵy 6 qazandaǵy №19 QR Prezıdenttigine kandıdat retinde N. Áltaevty usyný týraly hattamasy Astana qalalyq Baıqońyr aýdandyq sotynyń 2022 jylǵy 17 qazandaǵy sheshimi boıynsha jaramsyz dep tanylýyna baılanysty Ortalyq saılaý komıssııasynda QR Prezıdenttigine kandıdat usyný týraly qoldanystaǵy qujaty joq dep tanylady. Sol sebepten Ortalyq saılaý komıssııasy músheleriniń qaraýyna tirkeýden bas tartý týraly tıisti hattama men qaýly jobasy daıyndalyp, usynyldy», - dedi Shavkat Ótemisov.
Otyrysqa qatysýshylar Nurjan Áltaevty QR Prezıdenttigine kandıdat retinde tirkeýden bas tartý týraly qaýlyny qabyldady.
«Halyq demografııasy» qoǵamdyq birlestigi atynan usynylǵan Jumataı Álıev saılaýshylardyń qajetti qolyn jınaı almady jáne densaýlyq jaǵdaıy talapqa saı kelmedi.
«Jumataı Álıev kandıdattyń aktıvteri men mindettemeleri týraly deklaratsııany tapsyrǵany týraly anyqtamany jáne densaýlyq jaǵdaıy týraly medıtsınalyq qorytyndyny usyndy. Biraq densaýlyq jaǵdaıy týraly medıtsınalyq tujyrymdama talaptarǵa sáıkes kelmeıdi», - dedi otyrys barysynda QR OSK múshesi Anastasııa Şegortsova.
Spıker aýmaqtyq saılaý komıssııalarynyń hattamalaryna sáıkes, J. Álıevti qoldaý maqsatynda 20 óńirden 187 723 qol jınalǵanyn atap ótti.
«Tekserý nátıjesinde 36 776 qol senimdi dep tanyldy. Bul saılaýshylardyń jalpy sanynyń 1%-dan azyn quraıdy. Osylaısha, saılaý týraly Konstıtýtsııalyq zańnyń 56-baby 2-tarmaǵynyń kandıdatty qoldaýǵa saılaýshylar qolynyń qajetti sany týraly talaby oryndalmady», - dedi ol.
OSK músheleri Jumataı Álıevti QR Prezıdenttigine kandıdat retinde tirkeýden bas tartý týraly qaýly qabyldaýǵa daýys berdi.
Aıta keteıik, búgin saǵat 18.00-de prezıdenttikke úmitkerlerdi tirkeý aıaqtalyp, kandıdattar saılaý aldyndaǵy úgit jumystaryna kiristi.
