Ortalyq saılaý komıssııasy sheteldik dıplomattarǵa saılaý protsesin túsindirdi
«Bul — Qazaqstan Táýelsizdik alǵaly ótkizilip jatqan jetinshi prezıdenttik saılaý. Muny elimizdegi demokratııanyń damýyndaǵy taǵy bir mańyzdy kezeń dep sanaýǵa bolady. Bul saılaý halqymyzǵa Qasym-Jomart Toqaevtyń úsh jyl prezıdenttigi týraly, ádil Qazaqstan ustanymy týraly paıymdaýǵa múmkindik beredi. Bul saılaýda ártúrli saıası kózqarasy bar alty kandıdat dodaǵa túsedi, básekege toly saılaý ótkizý úshin barlyq jaǵdaı jasalǵan. Prezıdenttikke kandıdattar qataryna saıası partııalardyń ókilderi ǵana emes, ártúrli birlestik ókilderi de kiredi. Bir atap óterligi, bizdiń tarıhymyzda alǵash ret eki áıel Prezıdenttikke úmitker bolyp otyr. Bul – Qazaqstannyń demokratııalyq damýyndaǵy taǵy bir qadam. Qazaqstan kóptegen jyldar boıy genderlik teńdikti qamtamasyz etý men áıelderdiń bıznes pen saıasattaǵy rólin arttyrý qadamdaryn jasap keledi. Qazir biz osy kúsh-jigerdiń jemisin kórip otyrmyz. Árıne, daýys berý Qazaqstannyń kózqarastarynyń shynaıy kórinisi bolsa ǵana saılaý nátıjesi Prezıdentke naqty jáne myqty mandat beredi. Osylaısha, Úkimet saılaýdy ádil jáne ashyq etýge nıetti. Prezıdent Qasym-Jomart Toqaev saılaý naýqany zańǵa sáıkes ashyq, jergilikti jáne halyqaralyq baıqaýshylardyń kóptep qatysýymen ótkiziletinin birneshe ret aıtty», - dedi Muhtar Tileýberdi.
Muhtar Tileýberdi prezıdenttik saılaýdy halyqaralyq uıymdar men Qazaqstanda akkredıttelgen dıplomatııalyq korpýs baqylaıtynyn atap ótti.
«Biz barlyq baıqaýshylarmen ózara jumys istesýge jáne saılaýdyń obektıvti baǵalanýyna úmittenemiz. Qazaqstan álemdik qoǵamdastyqtyń jaýapty múshesi ekenin atap ótkim keledi, sondyqtan biz saılaýdy ulttyq zańnamaǵa jáne halyqaralyq standarttarǵa saı ótkizýge tolyǵymen daıynbyz», - dep atap ótti spıker.
Mınıstr aldaǵy saılaýdyń birneshe aspektileri týraly da aıtty.
«Birinshiden, maýsym aıynda qabyldanǵan konstıtýtsııalyq túzetýler men reformalardan keıin Prezıdentke Memleket basshysy bolǵan kezde qandaı da bir saıası partııanyń múshesi bolýǵa tyıym salynǵan. Bul Prezıdenttiń saıası kúreske qatysýyn boldyrmaý men básekelestikke yqpal etýi úshin jasaldy. Sol sebepti Prezıdent jyl basynda AMANAT basqarýshy partııasynyń tóraǵasy qyzmetinen ketti. Osylaısha, bul saılaýdyń aldyńǵy saılaýdan aıyrmashylyǵy, qazirgi Prezıdent saıası partııanyń múshesi retinde usynylmaıdy
Ekinshiden, byltyr zańnamaǵa túzetýler engizilgen soń, bıýlletenderge «Bárine qarsymyn» baǵany engizildi. Bul baǵan aldaǵy saılaýda kúshine enedi. Eń bastysy – Prezıdenttiktiń jańa merzimi týraly aıta keteıin. 1 qyrkúıekte Prezıdent Qasym-Jomart Toqaev óz Joldaýynda prezıdenttik merzimin qaıta saılaý quqyǵynsyz jeti jylmen shekteýdi usyndy. Ol prezıdenttik mandatty bir merzimge shekteý Memleket basshysynyń ulttyq damýdyń strategııalyq mindetterine barynsha mán berýine yqpal etetinin aıtty. Muny bizdiń elimiz úshin naǵyz demokratııalyq serpin dep sanaýǵa bolady. Bir ǵana jeti jyldyq merzim bılikti monopolııalaý qaterlerin joıady jáne demokratııanyń negizgi qaǵıdattaryn nyǵaıtady», - deıdi Syrtqy ister mınıstri.
Onyń aıtýynsha, aldaǵy saılaý elde júzege asyrylyp jatqan aýqymdy reformalardan keıin ótedi. 10 kún buryn Memleket basshysy azamattyq qoǵam ókilderiniń qatysýymen maýsym referendýmynda qabyldanǵan 6 mańyzdy zańǵa qol qoıdy. Osy zańdardyń kúshine enýi saıası júıeni demokratııalandyrýǵa jáne memlekettik bılik tarmaqtary arasyndaǵy Prezıdenttiń ókilettikterin shekteýge jáne Parlamenttiń rólin kúsheıtýge qatysty tejeý men tepe-teńdik júıesin odan ári jetildirýge yqpal etedi.
«Parlament saılaýy kelesi jyldyń birinshi jartysyna josparlanǵan. Bul saılaý kezeńi bizdiń saıası, úkimettik jáne ekonomıkalyq júıelerimizdi qaıta jandandyrady jáne memlekettik basqarýdy aıtarlyqtaı jańǵyrtady. Biz Prezıdent jáne Parlament saılaýlaryna halyq kóptep qatysady dep úmittenemiz. Bizdiń azamattar ultymyzdyń bolashaǵyn anyqtaýda sheshýshi ról atqarýy tıis. Jahandyq geosaıası syn-qaterlerdi eskersek, aldaǵy saılaý Qazaqstan úshin ǵana emes, halyqaralyq qoǵamdastyq úshin de mańyzdy. Halyqaralyq daǵdarystar jahandyq turaqsyzdyq pen qaýip-qaterdiń sebebi bolyp otyrǵany barshaǵa aıan. Osylaısha, turaqty jáne gúldengen Qazaqstan halyqaralyq qoǵamdastyqtyń múddesine saı keledi, óıtkeni bizdiń elimiz keń aýqymdy jahandyq yntymaqtastyqqa, saýda men dıplomatııaǵa járdemdesýge umtylady. Bul saılaý osy maqsattarǵa jetýge yqpal etedi. Biz halyqaralyq áriptesterimiz ben búgin osynda usynylǵan elder tarapynan yntymaqtastyq pen qoldaý kútemiz», - dep tolyqtyrdy Muhtar Tileýberdi.
