Ortalyq saılaý komıssııasy Senat saılaýynyń qorytyndysyn 7 qazannan keshiktirmeı anyqtaıdy
Al saılaý qorytyndylary týraly habarlama buqaralyq aqparat quraldarynda 10 qazannan keshiktirilmeı jarııalanady. Bul týraly búgin Ortalyq saılaý komıssııasynyń otyrysynda OSK tóraǵasy Qýandyq Turǵanqulov málim etti.
Ortalyq saılaý komıssııasynyń málimetine qaraǵanda, Parlament Senaty depýtattarynyń saılaýynda daýys berý, daýystardy sanaý jáne onyń nátıjelerin jarııa etý 2014 jylǵy 1 qazanda tańdaýshylardyń (máslıhat depýtattarynyń) birlesken otyrysynda ótedi. Kóptegen óńirlerde otyrystar jergilikti ýaqyt boıynsha tańǵy saǵat 10-11-de bastalady. Tańdaýshylar otyrysyna oblystyń barlyq máslıhattarynan ókildik etetin saılanǵan depýtattar sanynyń elý paıyzdan astamy qatysqan jaǵdaıda, ol zańdy bolyp sanalady.
Sonymen qatar, OSK aqparatyna qaraǵanda, respýblıkada barlyǵy túrli deńgeıdegi 213 máslıhat jumys jasaıdy. Daýys berý ótkizilgen bolyp tanylýy úshin tańdaýshylardyń (máslıhat depýtattarynyń) birlesken otyrysynda oǵan qatysqan tańdaýshylardyń elý paıyzynan astamy daýys berýge qatysýy tıis.
Al daýys berýge qatysqan tańdaýshylardyń elý paıyzdan astamynyń daýysyn alǵan kandıdat saılanǵan bolyp esepteledi. «Saılaýdyń sońǵy qorytyndylaryn Ortsaılaýkom 7 qazannan keshiktirmeı anyqtaıdy. Saılaýdyń qorytyndylary týraly aqparat BAQ-ta 2014 jylǵy 10 qazanynan keshiktirmeı jarııalanady. Daýys berýdiń erkindigi men qupııalylyǵy qaǵıdattary negiz qalaýshy bolyp tabylady jáne bul múltiksiz oryndalýy tıis» - dep atap ótti Bas saılaýkom Q. Turǵanqulov.
