Ortalyq saılaý komıssııasy óńirlerde kóshpeli semınar-keńester ótkizdi

ASTANA. QazAqparat – Qazaqstan Respýblıkasy Prezıdentiniń kezekten tys saılaýyn ázirleý men ótkizý sheńberinde QR OSK músheleri el óńirlerine kóshpeli semınar-keńester ótkizip júr. Kezekti kezdesý Almaty qalasy, Pavlodar, Qyzylorda jáne Almaty oblystarynda ótti, dep habarlaıdy QazAqparat OSK saıtyna silteme jasap.

9 qarashada QR OSK tóraǵasynyń orynbasary Konstantın Petrov Pavlodar oblysyna, 10-12 qarashada Ortsaılaýkom múshesi Sábıla Mustafınamen birge Almaty oblysyna, QR OSK hatshysy Muhtar Erman 10 qarashada Qyzylorda oblysyna bardy.

Semınar-keńesterge aýmaqtyq jáne ýchaskelik saılaý komıssııalarynyń músheleri, kandıdattardyń saılaýaldy shtabtarynyń, BAQ, ýákiletti memlekettik organdardyń, sondaı-aq EQYU DIAQB jáne TMD Mıssııalarynyń baıqaýshylary qatysty.

Semınar-keńesterdiń birinshi bóliminde OSK músheleri ýákiletti memlekettik organdar men saılaý komıssııalary músheleriniń óńirlerde saılaýshylar tizimderi boıynsha júrgizilip jatqan jumystar, saılaýdy uıymdastyrýshylyq, materıaldyq-tehnıkalyq qamtamasyz etý, múgedektigi bar azamattar úshin saılaý ýchaskeleriniń fızıkalyq qoljetimdiligin qamtamasyz etý, saılaý protsesine qatysýshylardyń saılaý zańnamasynyń zańdylyǵyn saqtaýyn qadaǵalaýdy júzege asyrý, saılaý ýchaskelerinde quqyqtyq tártipti qamtamasyz etý, saılaý bıýlletenderin kúzetý jáne ýaqtyly jetkizý týraly baıandamalaryn tyńdady.

Semınar-keńes baǵdarlamasynyń ekinshi bóliminde OSK músheleri aýmaqtyq jáne ýchaskelik saılaý komıssııalary úshin keıs tehnologııasy negizinde iskerlik oıyn túrinde trenıngter ótkizdi.

Daýys berý kúnindegi is-qımyl algorıtmi boıynsha saılaý komıssııalary músheleriniń praktıkalyq daǵdylary, onyń ishinde daýys berý kúnine saılaý ýchaskesin daıyndaý, saılaý bıýlletenderin berý, úı-jaıdan tys daýys berýge arnalǵan saılaý jáshikterin súıemeldeý, daýystardy sanaý algorıtmi, daýys berý qorytyndylary boıynsha hattamalardy resimdeý jáne t.b. tekserildi. OSK-nyń basqa músheleri saılaý komıssııalary músheleriniń is-qımyl algorıtmi boıynsha naqtylaıtyn suraqtar qoıyp, daýys berý rásimin uıymdastyrýdaǵy basty mindet onyń ashyqtyǵyn qamtamasyz etý ekenin eske saldy.

Semınarlardan keıin OSK músheleri óńirlerdiń saılaý ýchaskelerine bardy. Saılaý komıssııalaryna OSK músheleri tarapynan ádistemelik jáne konsýltatsııalyq kómek kórsetildi.

Foto: election.gov.kz