Ortalyq organdarǵa «A korpýsy» laýazymdarynan taǵaıyndaý 1 tamyzǵa deıin aıaqtalady

Bul týraly búgin Ortalyq kommýnıkatsııalar qyzmetiniń brıfınginde QR Prezıdenti Ákimshiligi basshysynyń orynbasary Ǵabıdýlla Ábdirahymov málim etti.

"Qazirgi ýaqytta "A korpýsynyń" laýazymdaryna kadr rezervinen taǵaıyndaý bastaldy. Jergilikti atqarýshy organdarda barlyq aýdan ákimderi, oblys ákimderiniń apparat basshylary taǵaıyndaldy. 198 aýdan ákimderiniń 82 ákimi jańadan kelgen azamattar. Ortalyq organdarǵa "A korpýsy" laýazymdarynan taǵaıyndaý 1 tamyzǵa deıin aıaqtalady", - dep atap kórsetti Ǵ. Ábdirahymov.

Onyń aıtýynsha, "A korpýsynyń" kadrlyq rezervine kirý úshin 2024 úmitker ótinish bildirgen. Olardyń ishinen biliktilik talaptaryna sáıkes, 1851 úmitker testileýge jiberildi. Úmitkerlerdiń zańdardy, memlekettik tildi bilýi, basqarýshylyq-uıymdastyrýshylyq qabiletteri tekserildi. Testileýdiń qortyndysy boıynsha Kadr saıasaty jónindegi ulttyq komıssııaǵa 1122 úmitker jiberildi. Kadr saıasaty jónindegi ulttyq komıssııa barlyq úmitkerlerdi Aqordaǵa shaqyryp, áńgimelesý ótkizdi.

"Jalpy aıtqanda, testileýden úmitkerlerdiń 31 paıyzy, al áńgimelesý kezeńinen 16 paıyzy óte almady. Nátıjesinde "A korpýsynyń" 546 laýazymyna úmitker bolyp 940 adam kadr rezervine qabyldandy. Onyń ishinde 83 paıyzy - memlekettik qyzmetkerler, al 17 paıyz - bıznes, qoǵamdyq uıym, ulttyq kompanııalar men memlekettik mekemelerdiń ókilderi, 85 paıyzy - erler, al 15 paıyzy - áıelder", - dedi Ǵ. Ábdirahymov.