Ortalyq mýzeıde zańsyz esirtki aınalymynan alynǵan zattar kórsetiledi
ALMATY. QazAqparat - Qazaqstan Respýblıkasy Memlekettik Ortalyq mýzeıinde 5 shildede «Qaıtarylǵan qundylyqtar» kórmesi ashylady. Bul kórmeniń bir ereksheligi ekspozıtsııaǵa QR Qarjy mınıstrliginiń Qarjy monıtorıngi komıtetiniń Almaty qalasy boıynsha ekonomıkalyq tergeý departamenti zańsyz aınalymnan tárkilegen tarıhı jáne mádenı mańyzy bar zattar, beıneleý óneri týyndylary men antıkvarlyq buıymdar qoıylmaq, dep habarlaıdy QazAqparat tilshisi.
Bul mádenı qundylyqtar aǵymdaǵy jyly sot sheshimimen memleket paıdasyna berilip, komıssııanyń hattamalyq sheshimimen rásimdelgennen keıin Almaty qalasy boıynsha ekonomıkalyq tergeý departamentiniń tikeleı bastamasymen mýzeı qoryna tapsyryldy.
Uıymdastyrýshylar mádenı qundylyqtardy halyq ıgiligine qaıtarý boıynsha quqyq qorǵaý organdary men mýzeı tarapy atqarǵan jumys nátıjelerimen qala turǵyndary men qonaqtaryn tanystyrýdy maqsat etip otyr.
Kórmege kelýshiler Imperator saraıynyń sán-saltanaty men asa joǵary mártebesin kórsetetin K. Faberje zergerlik úıi shyǵarmalarynyń jaýharlary - ishinde tosyn syıy bar, gıloshırli sýretter jáne almazdarmen bezendirilgen pasha jumyrtqalary, sonymen qatar Reseı patshaıymy Elızaveta Petrovna beınelengen mınıatıýra men baǵaly áshekeıler saqtaýǵa arnalyp tabıǵı nefrıtten jasalǵan qobdıshany tamashalaıdy. Sonymen qatar kórme ekspozıtsııaǵa kóne dinı jáne sırek kezdesetin kitaptar qoıylady. Olardyń ishinde qoljazba Quran men tápsirler, Іnjil, Evangelıe, sondaı-aq, 1857 jyly ıvrıt jáne aǵylshyn tilderinde basyp shyǵarylǵan duǵalar jınaǵy da bar.
Kórermen nazaryna Qasteev, Isabaev, Hlýdov, S. Kalmykov syndy belgili qazaqstandyq sýretshilerdiń shyǵarmalary, sonymen qatar Gerard Daý, L. Býre, F. Rýbo, R. Zommer sekildi XVII- XX ǵasyrdaǵy shetel jáne orys beıneleý óneri sýretshileriniń týyndylary usynylady. Olardyń qataryndaǵy gollandtyq keskindeme óneriniń Altyn ǵasyr sheberi ári Rembrandt van Reınniń tuńǵysh shákirtteriniń biri Gerard Daýdyń (XVII ǵ.) «Skrıpkashy» kartınasyn erekshe atap ótken jón. Sonymen qatar kórmege «Forbes Kazakhstan» jýrnalyna jarııalanǵan úzdik ondyqtaǵy alty sýretshiniń jumysy qoıylǵan.
«Kelýshiler nazaryna «gýrda», «shamshır» «ıatagan», qanjar sııaqty sýyq qarý úlgileri men qorǵanys jaraqtary da usynylady. Sondaı-aq qarý-jaraq jasaý isiniń sheberi Matıa Barker shamamen 1774-1776 jj. Bırmıngemde (Anglııa) jasap shyǵarǵan «Washington and Lee» qos tapanshasy kelýshilerdiń zor qyzyǵýshylyǵyn týdyrary sózsiz. Ózgeshe bezendirilýimen, sıpatynyń ásemdigi jáne joǵary oryndaýshylyq sheberligimen erekshelenetin sándik-qoldanbaly óner buıymdary da kórme ekspozıtsııasynyń kórkin keltireri sózsiz. Olardyń qataryndaǵy HІH ǵasyrdyń sońyna jatatyn frantsýzdyń kamın saǵaty, «okımono» músinsheleri, farfor vazalar, shahmat jınaqtary kelýshilerdiń aıryqsha nazaryn aýdarady», - dedi mýzeıdiń baspasóz qyzmetinen.
Kórme 2019 jyldyń 15 qyrkúıegine deıin jalǵasady.
