Ortalyq memlekettik muraǵat elimizdegi ǵylymı jáne mádenı mańyzy bar iri tarıhı qujattyq derekkózderdi jınaýshy mekemege aınaldy
ALMATY. 24 qarasha. QazAqparat /Názıra Eleýhan/ - Almatyda Ortalyq memlekettik muraǵatyna 90 jyl tolýyna arnalǵan «Muraǵattar. Elimizdiń mádenı murasyn saqtaýdaǵy orny men qyzmeti, tarıhy» atty halyqaralyq ǵylymı-praktıkalyq konferentsııa bolyp ótti.
Onyń jumysyna ǵalymdar, mádenıet qaıratkerleri, muraǵatshylar, ólketanýshylar men qoǵamdyq ókilder, sondaı-aq, muraǵat ardagerleri qatysty.
Konferentsııada muraǵattyń elimizdiń mádenı murasyn saqtaýdaǵy orny men qyzmeti, muraǵatshylardyń qosyp jatqan úlesi, muraǵat tarıhynyń zerttelýi, sondaı-aq, muraǵattyń qoǵamnyń áleýmettik-mádenı salasyndaǵy búginde alatyn orny syndy taqyryptar talqylanyp, osy salaǵa qatysty ózge de máseleler qaraldy.
Konferentsııa barysynda: «Búginde Ortalyq memlekettik muraǵat elimizdegi ǵylymı jáne mádenı mańyzy bar iri tarıhı qujattyq derekkózderdi jınaýshy ǵylymı jáne mádenı mekemege aınaldy», - dep atap ótildi.
Ortalyq memlekettik muraǵattyń Bas dırektory Lázzat Aqtaevanyń aıtýynsha, Ortalyq muraǵattyń qorlary únemi tolyqtyrylyp otyrady. «Ár túrli baǵdarlamalar aıasynda, onyń ishinde «Qazaqstan Respýblıkasynda muraǵat isin damytý» baǵdarlamasy boıynsha qorymyzdy tolyqtyrý jónindegi jumystar oryndalýda. Túrkııadan, Eýropadan, Arab elderinen sońǵy jyldary kóp qujattar men kóshirmeler aldyq. Máselen, tek Reseı muraǵattarynyń ózinen, on altynshy ǵasyrdan bastap, Qazaqstan tarıhy boıynsha 1000-nan asa qundy qujattardyń kóshirmeleri alyndy»,-dedi ol.
Onyń aıtýynsha, qazirgi tańda muraǵatta 34 qyzmetker jumys jasaıdy. «Olar jyl saıyn taqyryptyq kemeńgerlik jáne áleýmettik-quqyqtyq sıpatta 2000-nan asa suraý-hattarǵa jaýaptar ázirleýmen qatar, ǵylymı mekemelermen birlesip, muraǵat qujattarynyń negizinde qujattar men materıaldardyń 100-den asa jınaqtaryn shyǵardy. Olardyń arasynda «Bókeı handyǵynyń tarıhy (1801-1852 j.j), «Akademık Q.I.Sátpaev», «Qazaqstan 1941-1945 jyldardaǵy Uly Otan soǵysy kezinde» jáne t.b. kóptegen materıaldar bar. Ol jınaqtarǵa Reseı Federatsııasy muraǵattarynyń qujattary da qosylǵan»,- dedi L. Aqtaeva.
Konferentsııa barysynda Ortalyq memlekettik muraǵatyyń 90 jyldyǵyna arnalǵan derekti fılm kórsetilip, «Jaýhar jádigerler» atty kórme ashyldy. Kórmege sońǵy ýaqytta shetelderden alynǵan qundy muraǵat qujattary men kóshirmeler qoıylǵan.
