Ortalyq Kalıfornııada orman órti kúsheıip tur
ASTANA. QazAqparat - Kalıfornııa shtatynyń ortalyq bóligindegi orman órti ótken táýlikterde eki ese údegen. Órtten eki adam qaza tapty, dep habarlady Bı-bı-sı.
Qazir órt jaılaǵan aýmaq 7500 gektardan asqan.
Shtat gýbernatory Djerrı Braýn zardap shekken aımaqta tótenshe jaǵdaı rejımi engizilgenin habarlady. Orman órti júzdegen qurylysty joıǵan. Taǵy 1500-ge jýyq úı men qurylys keshenderine qaýip tónip tur.
Órt ótken beısenbide Beıkersfıld qalasynyń soltústik-shyǵysyndaǵy taýlarda shyqqan. Jaqyn ornalasqan eldi mekenderdiń júzdegen turǵyndary kóshirilgen. Aldaǵy ýaqytta Leık-Izabella eldi mekeninen 3 myń turǵyn kóshiriletini aıtylýda.
Aımaqtyń aýa raıy sońǵy kúnderi qatty ysyp, qurǵaǵan. Juma kúni aýa temperatýrasy Tselsıı boıynsha 32 gradýstan asqan.
Maýsymda AQSh-tyń ońtústik-batysynda aýa raıy qatty ysyp, sonyń saldarynan kóptegen shtattarda ormandardan órt shyqqan. Eń úlken órt Nıý-Meksıko shtatynda Albýkerke qalasynyń ońtústik-shyǵysynda oryn alǵan. Onyń saldarynan 20-dan astam úı janyp, kóptegen otbasylar kóshirilgen.
Ótken aptada Kalıfornııanyń ońtústiginde órt shyǵyp, Santa-Barbara aýdanyndaǵy úıler men Los-Andjelestiń soltústigine qaýip tóndirdi.
