Ortalyq Azııanyń taǵdyry úshin Qazaqstanǵa erekshe jaýapkershilik júkteledi - Toqaev

NUR-SULTAN. QazAqparat – QR Syrtqy ister mınıstrliginiń keńeıtilgen alqa májilisinde QR Prezıdenti Qasym-Jomart Toqaev «Sý dıplomatııasy» boıynsha kelissózdi tezirek aıaqtaýǵa pikir bildirdi, dep habarlaıdy QazAqparat tilshisi.

Qazaqstannyń Ortalyq Azııadaǵy kóshbasshylyq ornyn nyǵaıtý taqyrybyna toqtalǵan Prezıdent: «Men joǵaryda aıtqanymdaı, bul – asa mańyzdy mindet. Biz osy aımaqta erekshe mártebege ıe ekenimizdi batyl málimdeı bilýge tıispiz. Buǵan tolyq negiz bar», - dedi.

Osy oraıda Memleket basshysy ekonomıkamyz Orta Azııadaǵy basqa elderdiń ekonomıkasyna qaraǵanda áldeqaıda qýatty ekenin, biz Eýrazııadaǵy basty kólik dálizderi toǵysqan geostrategııalyq ortalyqta turǵanymyzdy, aýqymdy ekonomıkalyq jáne demokratııalyq reformalar belsendi túrde júzege asyrylyp jatqanyn, zııatkerlik jáne adamı resýrsymyz bar ekenin, halyqaralyq qaýymdastyqtyń aldyndaǵy abyroı-bedelimiz joǵary ekenin atap ótti.

«Osyǵan oraı, Ortalyq Azııanyń taǵdyry úshin Qazaqstanǵa erekshe jaýapkershilik júkteledi. Óńirdegi ózekti máselelerdi aıqyndap, ony sheshý kezinde elimiz mańyzdy ról atqarady. «Sý dıplomatııasy» boıynsha kelissózdi tezirek aıaqtaý Qazaqstan men Ortalyq Azııa elderiniń jáne Reseı men Qytaıdyń ortaq múddesine saı keledi dep sanaımyn. Transshekaralyq sý resýrstaryn ádil jáne tıimdi paıdalaný aımaqta azyq-túlik qaýipsizdigin qamtamasyz etýdiń basty kepili bolmaq», - dedi Qasym-Jomart Toqaev.