Ortalyq Azııanyń ekonomıkasy ósedi - QHQK-niń boljamy
ASTANA. QazAqparat - Qazaqstannyń xalyqaralyq qatynastar keńesi (QHQK) bıylǵy jyldyń mańyzdy oqıǵalaryn jarııalady. Keńestiń boljamyna sáıkes, Ortalyq Azııa elderiniń ekonomıkalary ósedi, dep xabarlaıdy QazAqparat tilshisi.
Dúnıejúzilik banktiń esebine sáıkes, aǵymdaǵy jylda Ortalyq Azııanyń ekonomıkalyq ósimi shamamen 2,7 paıyzdy quraıdy. Qazaqstanda - 2-3 paıyz, Qyrǵyzstanda - 3-3,5 paıyz, Tájikstanda - 5-6 paıyz, al Ózbekstan men Túrikmenstanda ekonomıkalyq ósim ortasha eseppen 6 paıyzdyń aınalasynda bolady degen boljam bar. "Árıne, energııa resýrstarynyń baǵasy ekonomıkalyq ósimge oń áserin tıgizedi. Máselen, Brent markaly munaıdyń barreli 55-70 dollardyń shamasynda bolady. Budan bólek, ıntegratsııalyq úderisterdiń jandanýy Ortalyq Azııadaǵy ekonomıkalyq jaǵdaıdy jaqsartýǵa óz septigin tıgizedi", - deıdi Qazaqstannyń xalyqaralyq qatynastar keńesiniń tóraǵasy Erlan Qarın.
Onyń aıtýynsha, qazirgi boljamǵa qaramastan, Ortalyq Azııanyń ekonomıkalyq ósimi álemdegi geosaıası jáne ekonomıkalyq ózgeristerge baılanysty bolmaq. Máselen, AQSh-tyń Federaldyq rezerv qyzmeti eseptik mólsherlemeni arttyratyn bolsa, ulttyq valıýtalar álsireıdi, qaryz somalary ulǵaıady, ınflıatsııanyń úlesi de arta túsedi. Sonyń saldarynan ekonomıkalyq ósim tejelýi ábden múmkin.
