Ortalyq Azııadaǵy tuńǵysh biregeı jaratylystaný murajaıy Pavlodarda ashylady
PAVLODAR. QazAqparat - Pavlodar qalasynda jaratylystaný ǵylymdary mýltımedııalyq murajaı kesheni ashylady, dep habarlaıdy pavlodarnews.kz.
Bul týraly óńirlik kommýnıkatsııalar qyzmetinde ótken baspasóz jıynynda G.N.Potanın atyndaǵy oblystyq tarıhı-ólketaný mýzeıiniń basshysy Gúlnár Nurahmetova málim etti.
«Jańadan ashylatyn mýzeı G.N.Potanın atyndaǵy mýzeıdiń taqyryptyq bólimi retinde tirkeletin bolady, - dedi Gúlnár Nurahmetova.
Onyń sózinshe, qazirgi ýaqytta atalǵan oryndaǵy ǵımaratta eki qabatty japsarjaı qurylysy júrip jatyr. Mýzeı ekspozıtsııasyn qurastyrý jóninde saraptamalyq topqa «Pitch» kompanııasynyń daıyndaǵan jobasy usynyldy. Kompanııa jaratylystaný mýzeıi jóninde usynǵan tujyrymdamasy boıynsha mádenı orynnyń negizgi taqyryby geologııa, paleontologııa, arheologııa ǵylymdary bolmaq. Turaqty ekspozıtsııa zalynda geologııalyq kezeńder, mıneraldar (mınerlardar týraly proektsııalyq kitap usynylady), «Paıdaly qazbalar», «Qazba jumystary» kórinis tabady. Qazaqstannyń barlyq arheologııalyq ınteraktıvti kartasy usynylady.
«Bul mýzeıdiń ereksheligi - álemdik mýzeılerde qoldanylatyn júıelerdi qoldanýynda», - dedi «Pitch» kompanııasynyń ókili Danıel Orazbekov.
Onyń sózinshe, mýzeıge kelýshilerge aıtýǵa, túsindirýge ońaı bolady. Oǵan qosa, jobamyzda mýzeı bazasynda zertteý ortalyǵyn ashýdy usyndyq. Sondaı-aq mekemede elimizde alǵash ret arheologııalyq zattardy tsıfrlandyrý boıynsha jumystar júrgiziledi.
«Meniń bilýimshe, Pavlodar arheologııalyq zattarǵa baı. Onyń dáleli «Qazqonaq» paleontologııalyq eskertkishi bar. Sondaı-aq oqýshylar men stýdentterge arnalǵan oqytý bólimi de qarastyrylǵan. Mýzeı óziniń taqyryptary boıynsha ǵalamshardyń paıda bolýynan adamzattyń jaratylýyna deıin qamtıtyn Qazaqstanda, tipti Ortalyq Azııadaǵy birinshi jaratylystaný mýzeıi bolady»,-deıdi kompanııa ókili.
Danıel Orazbekovtyń aıtýynsha, mýzeı jumysy kelesi jyly aıaqtalyp qalýy múmkin.
«Qazirgi kezde biz tek ekspozıtsııany qurastyrý boıynsha jobany usyndyq», - dedi «Pitch» kompanııasynyń ókili.
«Ǵımarattyń qurylysy júrgizilip jatyr. Bizge tek qabyrǵalary turǵyzylyp beriledi. Qalǵan bólmelerdi daıyndaý jumysymen biz aınalysamyz. Nysan bıyl aıaqtalýy kerek. Eger bizdiń joba maquldansa, ári qaraı smetalyq joba daıyndalady. Eger qańtardan bastap mýzeıdiń ishki ekspozıtsııasyna kirissek, alty-jeti aı ýaqyt ketedi»-deıdi ol.
Aıta keteıik, «Pitch» kompanııasy Máskeý qalasynda A.Vozenskııdiń mádenı ortalyǵyn, Sankt-Peterbýrg qalasynda Reseıdiń temir jol mýzeıin, Prohorovkadaǵy quryshty tank tehnıkasynyń mýzeıin, EKSPO jáne QR Ulttyq mýzeıiniń ekspozıtsııasyn, sonymen qatar, mýltımedııalyq ınstallıatsııalar men shoýlardy iske asyrǵan.
