Ortalyq Azııadaǵy eń iri kólik-logıstıkalyq qyzmetter men tehnologııalar kórmesi ashyldy
ASTANA. QazAqparat - Búgin Astanadaǵy «Kórme» ortalyǵynda 21-shi «Kólik jáne logıstıka» - TransKazakhstan / Translogistica 2017 halyqaralyq kórmesi ashyldy.
Bul týraly QR Investıtsııalar jáne damý mınıstrliginiń baspasóz qyzmeti habarlaıdy.
Bul Ortalyq Azııadaǵy eń iri kólik-logıstıkalyq qyzmetter men tehnologııalar kórmesi bolyp esepteledi. Kórmeni Qazaqstan Respýblıkasynyń Investıtsııalar jáne damý vıtse-mınıstri Roman Sklıar ashty.
«Vıtse-mınıstr quttyqtaý sózinde kórmedegi jan-jaqty iskerlik qarym-qatynas qazirgi ekonomıkalyq jaǵdaıda kólik salasynyń problemalaryn sheshýdiń praktıkalyq joldaryn talqylaýǵa múmkindik beretinin atap ótti» delingen habarlamada.
«TransKazakhstan / Translogistica 2017» kólik jáne ekspedıtorlyq qyzmetterden bastap, taýarlardy saqtaýǵa jáne óńdeýge arnalǵan baǵdarlamalyq qamtamasyz etý men jabdyqtarǵa deıingi tolyq keshendi salalyq sheshimderdi kórsetedi.
Kórmege Qazaqstan, Reseı, Belarýs, Ýkraına, Qytaı, Latvııa, Lıtva, Estonııa, Ázerbaıjan, Fınlıandııadan kelgen kompanııalar qatysýda. Sonymen qatar, otandyq kompanııalardyń ekspozıtsııalary kórme alańynyń 35% -yn qamtyp otyr.
Kórme «Jańa Eýrazııa: eýroazııalyq transkontınentaldy marshrýttardaǵy kóliktik-logıstıkalyq júıelerdi damytý» taqyrybynda XII halyqaralyq «Trans Eýrazııa-2017» konferentsııasy aıasynda ótip jatyr.
