Ortalyq Azııadaǵy eń iri ınfraqurylymdyq avtojol jobasynyń qurylysy aıaqtalýǵa jaqyn
Jobany iske asyrý 2018 jyly memlekettik-jekemenshik áriptestik aıasynda bastalǵan bolatyn. Úlken Almaty aınalma avtomobıl jolynyń qurylysy eki jyldan keıin bastaldy. Kontsessııa shartyna sáıkes, qurylys merzimi 50 aıǵa josparlanǵan. Alaıda, qurylystyń qarqyndy júrgizilýine baılanysty kontsessıoner jobany erterek aıaqtamaq.
«Avtojol qurylysy boıynsha barlyq negizgi degen jumystar aıaqtaldy. Qazirgi ýaqytta abattandyrý jáne jol aqysyn alý júıesi ornatylyp jatyr. Kontsessııa týraly zańǵa sáıkes jobalar ınvestorlarǵa memleket balansyna qabyldanǵannan keıin ǵana beriledi. Osyǵan baılanysty paıdalanýǵa berý 2023 jyldyń ekinshi jartysyna josparlanyp otyr», - dep habarlady IIDM Avtomobıl joldary komıtetiniń tóraǵasy Tólegen Abdýllın.
Júrdek jol negizinen alty jolaqty, al keıbir jerlerde tórt jolaqty bolmaq. Sondyqtan, ruqsat etilgen maksımaldy jyldamdyqta, ıaǵnı saǵatyna 110-140 km júrgen jaǵdaıda 66 km qashyqtyqty nebári jarty saǵatta eńserýge ábden bolady.
«Bul – memlekettik-jekeshelik áriptestik aıasyndaǵy Ortalyq Azııadaǵy jol qurylysynyń eń iri ınfraqurylymdyq jobasy. Atalǵan jobany iske asyrý joldyń tranzıttik áleýetin joǵarylatyp, marshrýttardyń básekege qabilettiligin arttyrady. Sondaı-aq, jol qozǵalysy qaýipsizdigin qamtamasyz etip, megapolıs kóshelerindegi keptelisti azaıtady jáne ekologııalyq jaǵdaıdy jaqsartady», - dep atap ótti Tólegen Abdýllın.
Aıta ketý kerek, Úlken Almaty aınalma avtomobıl joly Qaskeleń mańyndaǵy Qyrǵaýyldy aýylynan bastalyp, Talǵar janyndaǵy Qyzylqaırat aýylynda aıaqtalady. Atalǵan tas jol Almaty oblysynyń Qarasaı, Іle jáne Talǵar aýdandaryndaǵy 14 eldi meken arqyly ótedi. Bul avtojol Batys Qytaı - Batys Eýropa tranzıttik dáliziniń negizgi býyny bolýy kerek.
