Ortalyq Azııada ıadrolyq qarýdan azat aımaqtyń qurylýy koreı túbegine úlgi bola alady - Tileýberdi
«Koreı túbegindegi oń ózgeristerdi de baıqap otyrmyz. Qazaqstan koreı túbegindegi «beıbit protsesti» jáne Seýldiń koreıaralyq qatynastardy damytý ári óńirdegi shıelenisti tómendetý saıasatyn qoldaıdy. AQSh pen KHDR arasynda 2018 jáne 2019 jyldary ótken sammıtter taraptardyń ashyq teketires pen ózara aıyptaý dáýirin aıaqtaýǵa nıetti ekendigin kórsetedi. Sonymen qatar Qazaqstan da KHDR-diń ıadrolyq máseleleri tóńiregindegi aǵymdyq problemalardy qyzyǵýshylyq tanytatyn barlyq taraptyń múddelerin eskere otyryp, dıalog arqyly beıbit jolmen ǵana retteýge bolady dep sanaıdy», - dedi Muhtar Tileýberdi.
Osy oraıda mınıstr Qazaqstan úshin ıadrolyq qarýdan azat beıbitshilikke qol jetkizý basty basymdyq sanalatyndyǵyn basa aıtty.
«Qazirgi álemde qarýdyń osynaý túrine ıelik etý keıde ústemdiktiń kórsetkishi bolyp sanalmaıdy. Qaıta jahandyq qaýipsizdikke qater tóndirip, halyqaralyq qoǵamdastyqpen yntymaqtastyqqa kedergi týdyrady. Osyǵan oraı Ortalyq Azııada ıadrolyq qarýdan azat biregeı aımaqtyń qurylýy koreı túbegi óńiri úshin de úlgi qyzmetin atqara alady», - dedi mınıstr.
Aıta keteıik, sharaǵa Qazaqstan, Ózbekstan, Qyrǵyzstan, Tájikstan, Ońtústik Koreıa Syrtqy ister mınıstrleri qatysýda. Al Túrikmenstan tarapynan Qazaqstandaǵy Elshisi kelgen.
