«Ortalyq Azııada ıslamdyq qarjylandyrý ortalyǵyna aınalamyz» - respýblıkalyq basylymdarǵa sholý
ASTANA. Shildeniń 20-sy. QazAqparat - Qazaq aqparat agenttigi respýblıkalyq basylymdarda shildeniń 20-sy, seısenbi kúni shyqqan ózekti materıaldarǵa sholýdy usynady.
***
«Aıqyn» basylymy búgingi sanynda «Kóptiń kózine túsken Kendirli» degen taqyryppen qyzyqty materıal jarııalapty. Maqalada Mańǵystaý oblysynda kópten beri aıtylyp júrgen «Kendirli» halyqaralyq kýrortynyń jobasyna jan bitip, jaqyn arada alǵashqy ınfraqurylymdyq qurylys jumystary bastalatyny baıandalǵan. Aptanyń basynda óńirge at basyn tiregen ǵajaıyp jobanyń negizgi iske asyrýshysy, ıaǵnı halyqaralyq kompanııanyń sarapshylary Aqtaý qalasy jáne Qaraqııa aýdany ákimdikteriniń ókilderimen kezdesken. Sonymen qatar jobany júzege asyrýshylar oblys ákimi Qyrymbek Kósherbaevqa álemdegi úzdik demalys aımaǵyna aınalýy tıis «Kendirli» halyqaralyq kýrorty jobasy qurylysynyń bas josparyn tanystyryp, naqty sheshimge kelgenderin habarlaǵan. Jobanyń quny 2,3 mıllıard AQSh dollaryn quraıdy.
Atalǵan basylymnyń habarlaýynsha, elimizde endi ekinshi Islam banki qurylatyn bolady. «Ortalyq Azııada ıslamdyq qarjylandyrý ortalyǵyna aınalamyz» taqyrybyndaǵy materıalda Qazaqstandaǵy sharıǵat sharttaryna sáıkes qarjylyq qyzmet kórsetetin alǵashqy kompanııa - «Fattah Finance» aktsıonerlik qoǵamy Malaızııa eliniń qatysýymen Qazaqstanda ıslam bankin ashýǵa, Halal habty qurýǵa qol jetkizgeni jarııalanyp otyr. Qazaqstan osylaısha, Orta Azııa men TMD elderi aımaǵyndaǵy ıslamdyq qarjylandyrýdyń ortalyǵyna aınala bastady. Bizdiń eldiń keler jyly Islam konferentsııasy uıymyna tóraǵalyq etetinin eskersek, bul bir sáti túsken shara bolmaq. Osy jáne qoǵamda qalyptasyp otyrǵan basqa da ózekti máseleler jóninde «Aıqynnyń» búgingi sanynan oqýǵa bolady.
***
«Alash aınasy» basylymynyń jazýynsha, Shyǵys Qazaqstan oblysynyń Besqaraǵaı aýdanyna qarasty Aqkól aýylynda bir ǵasyrdan astam tarıhqa ıe ǵajaıyp meshit bar. Biregeıligi sol - onyń qabyrǵasy kezinde bir shege qaǵylmastan, taza aǵashtan turǵyzylǵan. Alaıda qazir ol apattyq jaǵdaıda tur. Bul másele jóninde basylymnyń búgingi sanynda jaryq kórgen «Alla úıi apatty jaǵdaıda tur» atty maqaladan oqýǵa bolady.
Sondaı-aq atalǵan basylymnyń habarlaýynsha, demografııalyq dúmpý jasaýdan áldeqashan ótip ketkenimizdi baǵamdamaı, «burynǵydaı emes, bala týý kórsetkishi kóterilip keledi» dep álham-shúkir aıtyp otyrǵan shaqta etekten tartar kedergiler kóbeıip keledi. Statıstıkalyq málimetterge qaraǵanda, elimizdegi otbasylardyń 15 paıyzy balaly bolýdan kúder úzgen. 30 paıyzy reprodýktıvti tehnologııa boıynsha emdelýleri qajet. Árbir besinshi otbasy bedeýliktiń quryǵyna tusalǵan. Bul týraly «Alash aınasy» basylymnyń búgingi sanynda jaryq kórgen «Jatyr da jalǵa beriletin boldy» atty maqaladan oqısyzdar.
***
«Astana aqshamy» basylymy búgingi sanynda Astananyń Bas josparynyń qala qurylysy aıasynda elorda irgesindegi aýyldyq aımaqtardy damytý týraly jobasyna sáıkes Astana mańyndaǵy aýyldar kórkeıetini aıtylǵan. Basylym tilshisiniń habarlaýynsha, Elbasy tapsyrmasyna seıkes ázirlengen Astana qalasy Bas jospary «Ǵylymı-zertteý jobalaý ınstıtýty» MKK-nyń elorda mańyndaǵy aýyldardy órkendetýge baǵyttalǵan jobasy keshe qoǵamdyq talqyǵa túsken. Atap aıtqanda, joba aıasynda Aqmolanyń 17 aýdany men Qaraǵandy oblysynyń birqatar aýmaǵy Astanamen birge kórkeımek. Al joba atalǵan eki oblys pen bas qalanyń 381,6 myń sharshy metr jerin qamtıdy. Bul týraly basylymyndaǵy «Astana irgesindegi aýyldar» atty maqaladan oqýǵa bolady.
***
«Lıter» basylymynyń búgingi sanynda Kabýlde Aýǵanstan máselesine arnalǵan halyqaralyq konferentsııanyń jumysy bastalatyny jarııalanǵan. Basylymnyń jazýynsha, Aýǵanstan jáne barsha álemge mańyzdy sanalatyn bul sharaǵa qatysý úshin Astanadan EQYU-nyń Іs basyndaǵy tóraǵasy, QR Memlekettik hatshysy-Syrtqy ister mınıstri Qanat Saýdabaev atalǵan memleketke saparmen júrip ketken. Osy aýqymdy forýmda Aýǵanstandy turaqtandyrýǵa jáne qaıta qurýǵa arnalǵan ózekti máseleler qamtylmaq. Konferentsııaǵa qatysatyn 70 elden kelgen delegattardyń qaýipsizdigi úshin Aýǵanstan bıligi teńdessiz sharalardy qabyldaǵan, ıaǵnı áýe keńistigin jaýyp tastap, astanadaǵy avtokólikterdiń qozǵalysyna shekteý jasaǵan, sondaı-aq elde eki demalys kúni jarııalanǵan.
