«Ortalyq Azııa talanttardy izdeıdi» jobasy efırge jol tartpaq
ALMATY. QazAqparat - Central Asia's Got Talent (Ortalyq Azııa talanttardy izdeıdi) jobasy 15 qyrkúıekten bastap «Habar» arnasynyń efırinen kórsetiledi. Bul týraly baǵdarlamalar dırektory Aıkúmis Seksenbaeva Almatyda ótken baspasóz máslıhatynda aıtty, dep habarlaıdy QazAqparat tilshisi.
Central Asia's Got Talent jabasy qatysýshylardyń jasy men talantynyń qandaı bolǵanyna qaramastan baǵyn synap, ónerin kórsetýge múmkindik beretin televızııalyq shoý. Jeńimpazy ataq-dańqpen birge qomaqty qarjylaı syılyqqa ıe bolatyn joba 15 qyrkúıekten bastap «Habar» arnasynan kórsetiledi.
«Ortalyq Azııadaǵy eń aýqymdy talanttar shoýynyń tusaýkeseri qyrkúıek aıyna josparlanǵan. Kórermender taǵatsyzdana kútip júrgenine senimimiz mol. «Habar» agenttigi osynaý biregeı jobanyń bastamashysy boldy. Bul baıqaý - Qazaqstan, Qyrǵyzstan, Ózbekstan jáne Tájikistan elderiniń kórermenderi úshin kóptegen talantty adamdardy ashady jáne tanytady dep oılaımyz»,- dedi «Habar» arnasynyń baǵdarlamalar dırektory Aıkúmis Seksenbaeva.
Jobanyń bas prodıýseri Serik Aqyshevtiń aıtýynsha, Central Asia's Got Talent shoýy 4 memlekette birdeı ýaqytta efırge shyǵady. «Habar» (Qazaqstan), «Zo'r TV» (Ózbekstan), KTRK (Qyrǵyzstan) jáne «TV Safına» (Tájikstan) telearnalarynan kórsetiledi.
Central Asia's Got Talent jobasy 5 kezeńnen turady. Іrikteý, ashyq tyńdalym, shırek fınal, jartylaı fınal jáne Grand fınal. Qazirgi ýaqytta jobaǵa qatysýshylardyń ótinishteri qabyldanyp, tórt elde irikteý kezeńi men shırek fınal aıaqtaldy. Jartylaı fınal men Grand fınal tikeleı efırde kórsetiledi.
Konkýrs tóreshileri 4 memlekettiń tanymaly tulǵalary arasynan bekitildi. Nurlan Abdýllın (Qazaqstan) - belgili estrada ánshisi, telejúrgizýshi, Qazaqstannyń eńbek sińirgen qaıratkeri. Gúlnur Satylǵanova (Qyrǵyzstan) -Qyrǵyz Respýblıkasynyń halyq ártisi. Sıtora Farmonova (Ózbekstan) - ánshi,aktrısa. Alovýddın Abdýlloev (Tájikstan) - teatr jáne kıno ártisi,Tájikstannyń eńbek sińirgen mádenıet qaıratkeri.
Got Talent - brıtandyq Saımon Koýelldyń jobasy. Búginde bul joba lıtsenzııa arqyly álemniń 70 elinde júzege asyrylǵan. 2014 jyldyń sáýir aıynda Got Talent álemdegi eń tabysty televızııalyq format retinde Gınnestiń rekordtar kitabyna engen. Dál sol kezde telebaıqaýdyń franshızasy álemniń 58 elinde kórsetilgen.
