Ortalyq Azııa taǵamdary brendin qalyptastyrý kerek - Kazakh Tourism
ASTANA. QazAqparat - Kazakh Tourism kompanııasy kórshiles elderge ortalyq Azııa taǵamdaryn bir brendpen nasıhattaýdy usyndy, dep habarlaıdy QazAqparat tilshisi.
Usynys boıynsha Qazaqstannyń alǵashqy seriktesi Ózbekstan bolýy múmkin.
«Ózbekstandyq áriptesterimizge taǵamdarymyzdy bir brendpen nasıhattaýdy usynyp otyrmyz. Búkil álemniń saıahatshylary qazaqsha etti, ózbekshe palaýdy, uıǵyrsha laǵman jáne ózge de Ortalyq Azııa taǵamdaryn bir dastarhannan tata alatyndaı múmkindik jasaýymyz kerek. Mundaı mysaldar álemde jeterlik. Mysaly, ıtalııalyq ashana, frantsýz ashanasy bar, sonymen birge bárin biriktiretin eýropalyq ashana bar. Ázerbaıjan, grýzın jáne armıan taǵamdary Kavkaz ashanasy retinde tanymal. Bizde de baýyrlas elderdiń ashanasy tolyqqandy qalyptasty, ony Ortalyq Azııa ashanasy dep ataýǵa ábden bolady», - dep usynys bildirdi «Kazakh Tourism» UK» AQ basqarma tóraǵasy Rashıd Kúzembaev Astanada ótken Qazaqstan-Ózbekstan týrıstik forýmynda.
Onyń aıtýynsha, Ortalyq Azııa elderi óz taǵamdaryn tanymal týrıstik ónimge aınaldyrýy tıis. Bul úshin Qazaqstan Ortalyq Azııa taǵamdarynyń festıvalin kezekpen ótkizýdi usynady.
«Bastamashy el retinde alǵashqy taǵamdar festıvalin Shymkentte ótkize alamyz. Óıtkeni, Shymkentte barlyq resýrs bar jáne áleýeti tolyqqandy jetedi», - deıdi R. Kúzembaev.
Ulttyq kompanııa keltirgen derekterge sáıkes, sońǵy birneshe jylda gastronomııalyq týrlarǵa suranys ulǵaıdy jáne álemdik týrızmniń 30 protsentin qurap otyr. Týrısterdiń 79 protsenti jolǵa shyqpas buryn eldiń taǵamy men taǵamǵa qatysty sharalar kúntizbesin qaraıdy.
Foto: kazah.info
