Ortalyq Azııa odaǵyn «Túrkistan bestigi» dep ataý usynyldy

ASTANA. QazAqparat - Búgin Ortalyq Azııadaǵy qaýipsizdik máselelerine arnalǵan konferentsııada jańa aımaqtyq birlestikti qurý máselesi qaıta kóterildi. Al Qazaq-nemis ýnıversıteti janyndaǵy xalyqaralyq jáne aımaqtyq yntymaqtastyq ınstıtýtynyń dırektory Bolat Sultanov Ortalyq Azııanyń jańa odaǵyn «Túrkistan bestigi» etip qurýdy usyndy, dep habarlaıdy QazAqparat tilshisi.

Sarapshynyń aıtýynsha, osy salada ortalyq jáne shyǵys Eýropa elderiniń tájirıbesin paıdalanýǵa ábden bolady. Ol jaqta Vengrııa, Polsha, Chexııa men Slovakııa Eýropalyq odaqqa kirerdiń aldynda óz birlestigin quryp, ortaq máselelerdi birlesip sheshýdi uıǵardy. Al 2004 jyly odaqqa múshe bolǵannan keıin tórttikti saqtap qaldy. Sebebi aımaqtyq jáne xalyqaralyq máselederdi sheshkende birlesip jumys jasaǵan tıimdi. Tórt memleket Eýropalyq keńestiń árbir otyrysyna deıin aldymen ózderi jınalyp, ortaq ustanymdaryn ázirleıdi. Memleket basshylary da, sarapshylary da únemi jınalyp, barlyq ózekti máselelerdi talqylap otyrady. «Ortalyq Azııada dál osy tájirıbeni paıdalanýǵa bolady. Túrkistan qalasy atalǵan áriptestiktiń ortalyǵy bola alady. Al Ortalyq Azııanyń aımaqtyq birlestigin «Túrkistan bestigi» dep ataýǵa bolady», - deıdi Sultanov.

Aıta keteıik, búgin Astanada Qazaqstannyń strategııalyq zertteýler ınstıtýtynyń uıymdastyrýymen Ortalyq Azııadaǵy qaýipsizdik máselelerine arnalǵan jyl saıynǵy konferentsııa bastaldy. Bıylǵy konferentsııanyń taqyryby - «Jahandyq transformatsııa jaǵdaıyndaǵy Ortalyq Azııa». Jıynǵa Ózbekstan, Qyrǵyzstan, Qytaı men Reseıdiń sarapshylary qatysýda. Sol jerde depýtat Máýlen Áshimbaev Ortalyq Azııada jańa aımaqtyq birlestikti qurý máselesin qaıtadan kóterdi.