Ortalyq Azııa men Eýroodaq arasyndaǵy taýar aınalymy $49 mlrd qurady – Álıhan Smaıylov

ALMATY. QazAqparat – Qazaqstan Úkimeti Eýropalyq odaqpen yntymaqtastyqty eki jaqty formatta jáne óńiraralyq deńgeıde qarqyndy damýyn qoldaıdy. Bul týraly QR Premer-Mınıstri Álıhan Smaıylov Almatyda ótip jatqan «Eýropalyq odaq – Ortalyq Azııa» ekinshi ekonomıkalyq forýmynda aıtty, dep habarlaıdy QazAqparat tilshisi.

«Forýmnyń Qazaqstan men Eýropalyq odaq arasyndaǵy dıplomatııalyq qatynastardyń ornaǵanyna 30 jyl tolýymen tuspa-tus ótip jatqany erekshe mańyzǵa ıe. Astana men Brıýssel arasyndaǵy tıimdi seriktestik qatynastar kóp jylǵy pragmatıkalyq jáne dáıekti yqpaldastyqtyń nátıjesi bolyp tabylady. Óńir elderiniń ortaq kúsh-jigeri arqasynda búginde Ortalyq Azııa belsendi damyp kele jatqan úlken múmkindikter aımaǵy bolyp tabylady. Elderimiz bir-birin úılesimdi túrde tolyqtyrady. Al basty tiregi saýda-ekonomıkalyq saladaǵy yntymaqtastyq bolyp qala beredi.

Biz Eýropalyq odaqpen yntymaqtastyqtyń eki jaqty formatta jáne óńiraralyq deńgeıde qarqyndy damýyn qoldaımyz», - dedi Álıhan Smaıylov.

Úkimet basshysynyń sózinshe, ótken jyly Ortalyq Azııa men Eýroodaq arasyndaǵy taýar aınalymy 61% artyp, 49 mlrd dollardy qurady.

«Ekonomıkalyq áleýetimizdiń tolyq ashylýyna qaraı biz eýropalyq seriktesterimizben birlesip, bul kórsetkishti aıtarlyqtaı arttyra alatynymyzǵa senimdimiz. Ol úshin bizde belsendi paıdalanýdy jáne ilgeriletýdi qajet etetin eleýli rezervter bar», - dedi QR Premer-Mınıstri.