Ortalyq Azııa memleketteriniń ІІІ-shi Halyqaralyq teatr festıvali shet elde úlken rezonans týdyryp, mádenı gýmanıtarlyq yqpaldastyqty jandandyra túsedi - QR mádenıet vıtse-mınıstri
ALMATY. Mamyrdyń 27-si. QazAqparat /Názıra Eleýhan/ - Qazaqstan basshylyǵynyń Orta Azııa elderimen baılanysty nyǵaıtýdaǵy jemisti qyzmeti, bizdiń halyqtar arasyndaǵy rýhanı birigýdiń pozıtıvti faktory bolyp tabylady. Bul týraly keshe Almatyda QR mádenıet vıtse-mınıstri Asqar Bóribaev Ortalyq Azııa memleketteriniń ІІІ-shi Halyqaralyq teatr festıvaliniń ashylý saltanatynda aıtty,
dep habarlaıdy QazAqparat.
Onyń aıtýynsha, buǵan deıin ótkizilgen forým búgingi zamanǵy teatr óneriniń eń úzdik jetistikterimen tanystyryp ǵana qoıǵan joq, qatysýshy elder arasyndaǵy mádenı almasýdyń kópirine aınaldy, al, shyǵarmashylyq ujymdar qosymsha shabyt pen jańarýǵa stımýl aldy. "Bizdiń mádenı qarym-qatynasymyzdyń jaqsy perspektıvalyq damýy bar jáne jyldan-jylǵa jaqsy dástúrge aınalyp keledi. Osy jyly da óner súıer qaýym taǵy da ár qıly, álemdik jáne ulttyq klassıkany, tarıhı jáne zamanaýı dramatýrgııada qoıylǵan qoıylymdardy kórýge múmkindik alady. Bıylǵy fesıtıval shet elde úlken rezonans týdyryp, mádenı gýmanıtarlyq yqpaldastyqty jandandyra túsedi degen senimdemin", dep atap ótti Asqar Bóribaev.
Q. Qýanyshbaev atyndaǵy qazaq mýzykalyq drama teatrynyń dırektory Erkin Jýasbek:"Ótken jylǵy qyrǵyz jáne tatar sahna sheberleriniń óte jaqsy jumystary esimde. Bıyl da qyzyqty kóńilimnen shyǵatyn qoıylym kóremin degen úmitpen Astanadan ádeıi kelip otyrmyn. Bul festıval teatrlar men teatrlar arasyndaǵy qarym-qatynasty ornatýǵa, shyǵarmashylyq izdenýge, jańa esimderdi shyǵýyna, akterlardyń sheberlikterin baıqaýǵa, teatr salasyndaǵy jańalyqtarmen tanysýǵa múmkindik beretin, biz úshin óte mańyzdy shara, tipti óte qajetti shara desem bolady. Daǵdarysqa qaramastan Mádenıet mınıstrliginiń bul sharany ótkizip jatqandyǵy bizdi qýantady. Bolashaqta qoıylymdar men qatysýshylardyń sany ósip, kóbeıedi degen senimdemin", dep atap ótti ol.
Belgili jazýshy, dramatýrg Dýlat Isabekovtyń pikirinshe, mádenı sharany keń aýqymdy túrde nasıhattaý qajet. "Festıval kásipqoılar úshin sózsiz qajetti shara. Ol eń aldymen teatr óneriniń damýyna qajetti shara. Búginde bul tájirıbe, pikir almasý, jańalyqtarmen bólisý alańyna aınalyp otyr. Biz jańa repertýarlarmen tanysyp qana qoımaı, ózge elderdiń teatr ómiri jáne qyzmetimen tanysa alamyz", dedi ol.
Dýlat Isabekov sonymen qatar, festıval repertýary jaıynda kózqarasymen bólisti. "Munda eski qoıylymdar usynylǵan. Meniń pikirimshe, repertýarlar keńirek bolýy kerek edi. Ókinishke oraı, búgingi taqyrypta eshteńe joq. Zamandastar qaıda? Ózimiz qaıda? Sahnada sony kórgimiz keledi. Ol joq emes, bar. Sol bar dúnıelerdi ákelmegenderine tań qalyp otyrmyn", dep atap ótti ol.
Baıqaý jeńimpazdaryn, quramynda teatrtanýshylar, akterler, rejısserler, dramatýrgtar, sýretshiler jáne festıvalge qatysýshy elderdiń shyǵarmashylyq zııaly qaýym ókilderi bar arnaıy jasaqtalǵan qazylar alqasy 13 nomınatsııa boıynsha belgileıdi. Qazylar alqasyn QR Mádenıet mınıstrligi bekitti. Onyń bir múshesin Qazaqstan teatr qaıratkerleri odaǵy usynady.
Festıval mamyr aıynyń 30-na deıin jalǵasady.
