Ortalyq Azııa elektr energetıkalyq korporatsııasy men EQDB zaem kelisimine qol qoıdy
ALMATY. 26 naýryz. QazAqparat /Erlik Erjanuly/ - Búgin Almatyda «Ortalyq Azııa elektr energetıkalyq korporatsııasy» (OAEK) AQ men Eýropa qaıta qurý jáne damý banki (EQDB) Pavlodar, Ekibastuz, Petropavl qalalarynyń jylý jelilerin jańartý jónindegi zaem kelisimine qol qoıdy.
«Energetıka nysandarynyń tozýy erteden kele jatqan kókeıkesti máseleniń biri. Olardyń keıbiri ınvestıtsııalansa, keıbirine áli tartylǵan joq. Alaıda jylý jelilerindegi shyǵyn men qubyrlardyń tozýy óte úlken. Bul Qazaqstan ǵana emes, burynǵy keńestik respýblıkalardyń bárine tán ahýal. Shyǵyn 25 paıyzdy qurap otyr. Biz qazir qarjy ınstıtýttarynan naqty talaptarmen 40 mıllıon dollar kóleminde 2 zaem tartyp otyrmyz», deıdi «Ortalyq Azııa elektr energetıkalyq korporatsııasy» AQ-nyń Dırektorlar keńesiniń tóraǵasy Aleksandr Klebanov.
EQDB kredıttik jelisi 2 kredıtten turmaq. Birinshisi, 13 jyl merzimge 4,5 paıyzben beriletin 21,7 mıllıon eýro. Oǵan sondaı-aq, qazaqstandyq bankaralyq áleýmettik mólsherleme qosylady. Al 10 myń dollarǵa jýyq ekinshi kredıt 20 jyl merzimge berilmek. Onda bastapqy 10 jyldyq demalys jeńildigi bar. Bul jobany bank OAEK-nyń Korporatıvtik kepildigi boıynsha Taza tehnologııalar qorymen birlesip qarjylandyrmaq. Bul olardyń Taza tehnologııalar qorymen birlesip qarjylandyratyn Qazaqstandaǵy tuńǵysh jobasy bolyp otyr.
