Ortalyq Azııa elderiniń prezıdentteri Aral problemasyn talqylaıdy

TAShKENT. QazAqparat - 2018 jyly Ortalyq Azııa elderiniń memleket basshylary Aral teńizi problemasyn talqyǵa salady. Bul týraly búgin Ózbekstan prezıdenti Shavkat Mırzıeevpen shaǵyn jáne keńeıtilgen quramdaǵy kelissózderden keıingi birlesken málimdeme jasaý barysynda Qazaqstan Prezıdenti Nursultan Nazarbaev aıtty, dep habarlaıdy QazAqparattyń arnaýly tilshisi Tashkentten.

«Biz barlyǵymyz úshin óte kúrdeli sý problemasyn tyńǵylyqty talqyladyq. Eki baýyrlas halyq eki úlken ózen boıynda ómir súrýde jáne dál osylaı barlyq ýaqytta ómir súrdik, odan ary da ómir súre beretin bolamyz. Bul máselede ilgerileýshilikke qol jetkizdik dep sanaımyz. Atalǵan másele Ortalyq Azııa óńiriniń odan ári damýy úshin biregeı mańyzǵa ıe. Ortalyq Azııadaǵy transshekaralyq sý resýrstar óńirdiń barlyq halqy úshin baılyq jáne ıgilik  bolyp sanalýy tıis», - dedi Nursultan Nazarbaev.

Memleket basshysy ondaǵan mıllıon adamnyń taǵdyry sýdy tıimdi, aqylǵa syıymdy paıdalanýmen baılanysty ekendigin basa aıtty.

«Bul óte mańyzdy jáne biz kórshilerimiz Tájikstan, Qyrǵyzstan, Túrikmenstanǵa árbir memlekettiń múddesin ózara tıimdi saqtap, bul máseleni aqyldasa otyryp sheshýge shaqyramyz.  Ol dostyq pen senimdi nyǵaıtyp, barlyǵymyzdyń ıgiligimiz úshin jumys isteıtin bolady. Bizde Aral teńizi tóńiregende problema bar jáne kelesi jyly Halyqaralyq Araldy qutqarý qorynyń qurylǵanyna 25 jyl tolady. Qazirgi  ýaqytta ol atalǵan problemany sheshýdegi jalǵyz memleketaralyq tetik sanalady. Osyǵan baılanysty biz qor qyzmetin jandandyrý qajettigi týraly ustanymyz bir ekendigin rastadyq. Atap aıtqanda, keler jyly biz joǵary deńgeıdegi kezdeý ótkizýge nıettimiz. Búgingi kúni bul qorǵa Túrikmenstan tarapy tóralyq etedi», - dedi Qazaqstan Prezıdenti.

foto:namtaru.ru