Ortalyq Azııa elderiniń basshylary «Astana» HQO-men tanysty
Memleket basshysy Qyrǵyz Respýblıkasynyń Prezıdenti Sooronbaı Jeenbekovpen, Tájikstan Respýblıkasynyń Prezıdenti Emomalı Rahmonmen, Ózbekstan Respýblıkasynyń Prezıdenti Shavkat Mırzıeevpen birge «Astana» halyqaralyq qarjy ortalyǵynyń ashylýyna arnalǵan tsıfrlandyrý kórmesin aralap kórdi.
Qazaqstan Prezıdenti ınnovatsııalyq qarjy tehnologııalaryn damytýdy kózdeıtin tıimdi ortany qalyptastyrý «Astana» halyqaralyq qarjy ortalyǵy qyzmetiniń birden-bir mańyzdy baǵyty ekenin aıtty.
- «Astana» halyqaralyq qarjy ortalyǵynyń jumysyna qatysýshylar úshin Qazaqstannyń ǵana emes, búkil álemniń kapıtaly qoljetimdi bolady. Qarjy ortalyǵynda postkeńestik keńistikte balamasy joq, buryn-sońdy bolmaǵan jaǵdaılar jasaldy. Keshe ǵana biz saltanatty jaǵdaıda zamanaýı joǵary tehnologııaly ınfraqurylymy bar «Astana» halyqaralyq qarjy ortalyǵy bırjasynyń jumysyn bastadyq. Búginde onyń qyzmetine amerıkalyq NASDAK bırjasy jáne Shanhaı qor bırjasy qatysyp otyr, - dedi Nursultan Nazarbaev.
Tanystyrylym barysynda Qazaqstanda ınnovatsııalyq qarjy tehnologııalaryn damytý men ilgeriletý úshin qolaıly ekojúıeni qalyptastyrýǵa baǵyttalǵan birqatar jobalar kórsetildi. Sonyń ishinde, e-Justice (AHQO tsıfrlyq sot tóreligi júıesi), tsıfrlyq krıptobırja, krıptovalıýtalar úshin depozıtarıı, qarjylyq sýpermarket, kıberqaýipsizdik ortalyǵy, ıslam qarjy tehnologııalary, halyqaralyq startap baǵdarlamalary men basqa da jobalar bar.
«Astana» halyqaralyq qarjy ortalyǵynyń basqarýshysy Qaırat Kelimbetov Ortalyq Azııa elderiniń basshylaryna qarjy ortalyǵy qyzmetiniń negizgi qaǵıdattary jáne óńirdiń qarjy júıeleri úshin jol ashatyn múmkindikter jóninde áńgimelep, Jibek jolynyń boıynda ornalasqan elderdiń kásipkerlerin qarjy ortalyǵynyń qyzmetine belsendi atsalysýǵa shaqyrdy.
Sondaı-aq, tanystyrylym rásiminde «Astana» halyqaralyq qarjy ortalyǵy sotynyń tóraǵasy Lord Garrı Kennet Výlf jáne qarjy ortalyǵynyń basqarýshy dırektory, úzdiksiz kásibı damý bıýrosynyń kýratory Ernur Rysmaǵambetov sóz sóıledi.
