Ortalyq Azııa elderi túrli salada baılanystardy nyǵaıtýy kerek – Erlan Qarın

ASTANA. QazAqparat – Ortalyq Azııa elderi túrli salada baılanystardy nyǵaıtýy kerek. Bul týraly elordadaǵy birinshi Ortalyq Azııa medıaforýmynda Memlekettik keńesshi Erlan Qarın aıtty, dep habarlaıdy QazAqparat tilshisi.

«Keıingi jyldary Ortalyq Azııa memleketteri arasyndaǵy yntymaqtastyq qarqyndy damyp keledi. Buǵan alǵashqy jıyny Qazaqstanda ótken Ortalyq Azııa memleketteri basshylarynyń konsýltatıvtik kezdesýleri erekshe serpin berdi. Qazir Ortalyq Azııa ózindik mańyzy bar aımaqqa aınalýda. Bul - óńirlik biregeıligimizdi tanytýǵa, ortaq mádenı keńistik qalyptastyryp, álemge usynýǵa degen umtylysymyzdyń jemisi. Biz muny odan ári tereńdete túsýimiz kerek», - dedi E. Qarın.

Bul turǵyda ol medıa salasynda, mádenı-rýhanı baǵytta, qoǵamdyq-saıası ómirde baılanystardy nyǵaıtý qajet ekenin aıtty.

«Osy oraıda búgin tuńǵysh ret ótip jatqan Ortalyq Azııa medıaforýmy aıryqsha ról atqarady dep oılaımyn. Mundaı alqaly jıyndar arqyly aımaqtyq biregeıligimiz damıdy, tutastyǵymyz bekı túsedi. Qazaqstan bul baǵyttaǵy jumystardy qoldaýǵa, bastamalardy júzege asyrýǵa árqashan daıyn. Búgingi medıaforýmnyń Astanada ótýi sonyń aıqyn dáleli. Sondyqtan forýmda Ortalyq Azııa elderiniń ortaq múddesine saı keletin keleli oı-pikirler aıtylady dep senemin», - dedi QR Memlekettik keńesshisi.

Budan buryn habarlanǵandaı, Astanada І Ortalyq Azııa medıaforýmy jumysyn bastady.