Ortalyq Azııa elderi Syrdarııa basseıniniń sý sharýashylyǵy balansyn qaıta qaraýy múmkin

NUR-SULTAN. QazAqparat – Sardoba apatynan keıin Qazaqstan Syrdarııanyń basyndaǵy elderge ózen basseıniniń sý sharýashylyǵy balansyn jasaýdy usynyp, hat joldaǵan bolatyn. Ázirge bul usynysty Tájikstan men Ózbekstan qoldap otyr, dep habarlaıdy QazAqparat.

Ekologııa, geologııa jáne tabıǵı resrýstar mınıstrligine joldanǵan saýaldyń jaýabynda bul istiń qazir qandaı satyda turǵany baıandalǵan.

Vıtse-mınıstri Serik Qojanııazovtyń aıtýynsha, Syrdarııa ózeniniń basseıninde ornalasqan elderdiń naqty qansha sý alatynyn, sondaı-aq jańa sý sharýashylyǵy obektileriniń (sý qoımalarynyń, sý toraptarynyń, kanaldardyń jáne t. b.) ózen aǵysyna áserin anyqtaý maqsatynda qazaqstan tarapy Syrdarııa ózeni basseıniniń sý sharýashylyǵy balansyn jasaý týraly bastama kótergen.

«Resmı túrde Ózbekstan Respýblıkasyna, Tájikstan Respýblıkasyna jáne Qyrǵyz Respýblıkasynyń ýákiletti organdaryna usysyn jiberildi. Ózbek jáne tájik taraptary qazaqstandyq taraptyń Sý sharýashylyǵy balansyn ázirleý jónindegi usynysyn resmı túrde qoldady. Qazirgi ýaqytta bul másele qyrǵyz tarapymen pysyqtalýda. Sý sharýashylyǵy balasyn ázirleý barysynda Ózbekstan aýmaǵynda qansha sý qoımasy salynǵany jáne olardyń tehnıkalyq sıpattamalary anyqtalatyn bolady», - deıdi vedomstvo ókili.