Ortalyq Azııa elderi sońǵy jyldary aýǵan esirtkisi tasymalynyń soltústik dálizindegi tutynýshyǵa aınalyp bara jatyr

ALMATY. 2 naýryz. QazAqparat - Ortalyq Azııa elderiniń quqyq qorǵaý organdary óz aýmaǵy arqyly tasymaldanatyn aýǵan esirtkisiniń 3 paıyzyn ǵana qolǵa túsirýde. Bul týraly Ortalyq Azııalyq aımaqtyq aqparattyq úılestirý ortalyǵynyń dırektory Beksultan Sársekov búgin Almatyda aıtty.

«Sońǵy 4-5 jylda bizdiń málimetterimizge jáne BUU sarapshylarynyń derekterine qaraǵanda, Ortalyq Azııa elderi tranzıttik elden tutynýshyǵa aınalyp bara jatyr. Jyldan-jylǵa jastar arasynda apıyn men geroındi qoldaný artyp kele jatyr. Buǵan onyń el aýmaǵy arqyly ótýi men ońaı tabylýy túrtki bolýda», - deıdi B. Sársekov. Onyń paıymdaýynsha, esirtkini tasymaldaýǵa jaldanýshylar ońaı olja úshin ony ózderi de saýdalaı bastady. Bul óte qaýipti jaǵdaı. Oǵan shara qoldaný kerek. Esirtki tutynýdyń jalpy kólemin eshkim naqty aıta almaıdy. Boljam boıynsha sońǵy jyldary Aýǵanstandaǵy apıyn óndirisiniń kólemi 7-8 myń tonna aralyǵynda qubylýda. Onyń 30 paıyzy Ortalyq Azııa arqyly Eýropaǵa shyǵarylady.