Ortalyq Azııa basshylarynyń kezdesýi barlyǵyna yńǵaıly formatty qalyptastyrdy - Jumabek Sarabekov

ASTANA. QazAqparat - Astanadaǵy Ortalyq Azııa basshylarynyń kezdesýi tıimdi ári yńǵaıly formatty qalyptastyrýǵa múmkindik berdi. Osydan keıin aımaqtaǵy ıntegratsııa kúsheıedi degen boljam bar. Oǵan kórshi elderdegi saıası-ekonomıkalyq ózgerister de óz septigin tıgizedi, dep habarlaıdy QazAqparat tilshisi.

Álemdik ekonomıka jáne saıasat ınstıtýtynyń syrtqy saıasat jónindegi sarapshysy Jumabek Sarabekovtyń aıtýynsha, eń bastysy Ortalyq Azııa elderi kezdesýdiń formatyn aıqyndap aldy.

«Aımaq basshylary 9 jyldan beri alǵash ret kezdesip otyr. Sondyqtan barlyq máselelerdi bir kezdesýdiń aıasynda sheshý múmkin emes. Ony bári jaqsy túsinedi. Eń bastysy, bárine tıimdi ári yńǵaıly format qalyptasty. Beıresmı kezdesý bolsa, da birqatar kelisimderge qol qoıyldy. Aımaq basshylary qaýipsizdik keńesteriniń birlesken jumysyn kúsheıtýge kelisti. Negizi, búginde kezdesýdiń formattary kóp qoı. Halyqaralyq uıymdar bar, AQSh-tyń «5+1» formaty taǵy bar.  Biraq onyń bári syrtqy oıynshylardyń qatysýymen ótedi. Bul joly Ortalyq Azııa memleketteri toǵyz jyldan beri óz betinshe kezdesti. Bul - jaqsy faktor, jaqsy qadam», - dedi J.Sarabekov QazAqparat tilshisine bergen suhbatynda.

Sarapshynyń aıtýynsha, keshegi kezdesýge Túrikmenstannyń prezıdenti kelmese de, Májilis spıkeri men óz ulyn jiberip, Ortalyq Azııa basshylarynyń kezdesýine úlken mán berip otyrǵanyn kórsetti.

«Túrikmenstan basshysy jumys kestesine baılanysty kele almady. Degenmen, kezdesýge osy eldiń joǵary deńgeıdegi ókilderi qatysty. Májilis spıkeri keldi. Túrikmenstan prezıdentiniń uly Serdar Berdymuhamedov ta keldi. Bizdiń Prezıdentimizben jeke kezdesti. Sondyqtan Túrikmenstan Astanada ótken kezdesýge beı-jaı qaramaıtynyn kórsetti. Osyny ózderiniń málimdemesi arqyly da jetkizdi», - dep atap kórsetti J.Sarabekov.

Onyń oıynsha, Astanadaǵy kezdesýden keıin Ortalyq Azııadaǵy ıntegratsııa úderisteri kúsheıe túsedi. Oǵan aımaqtaǵy qazirgi jaǵdaı da qolaıly bolyp otyr. «Buǵan deıin biz Ortalyq Azııanyń ıntegratsııasyn kúsheıtýge birneshe ret tyrystyq. Biraq ol bastamalar sátsiz boldy. Oǵan obektıvti jáne sýbektıvti faktorlar sebep. Qazirgi kezde aımaqta múldem basqa jaǵdaı qalyptasyp otyr. Ózbekstannyń syrtqy saıasaty men ekonomıkasynda úlken ózgerister bolyp jatyr. Tájikstanmen aradaǵy qarym-qatynasy da jaqsaryp keledi. Bunyń barlyǵy Ortalyq Azııadaǵy ıntegratsııany jandandyra alady. Al Astanadaǵy kezdesý sonyń basy bolsa kerek. Memleket basshylary jyl saıyn turaqty túrde kezdesýge kelisti. Sebebi Ortalyq Azııanyń ishki saýda-sattyǵyn arttyrý qajet. Investıtsııalyq baılanystardy kúsheıtý kerek», - deıdi J.Sarabekov.  

Aıta keteıik, keshe Astanada Ortalyq Azııa elderi basshylarynyń jumys kezdesýi ótti. Keńeske Qyrǵyzstan Respýblıkasynyń Prezıdenti Sooronbaı Jeenbekov, Tájikstan basshysy Emomalı Rahmon, Ózbekstan Respýblıkasynyń Prezıdenti Shavkat Mırzıeev jáne Túrikmenstan Medjlısi tóraıymy Akdja Nýrberdyeva hanym qatysty.  QR Prezıdenti Nursultan Nazarbaevtyń aıtýynsha, Ortalyq Azııa elderi basshylarynyń baılanysy jandana tústi.  Keńestiń kelesi kezdesýi Tashkentte ótedi.