Ortalyq Afrıka Respýblıkasynda úsh reseılik jýrnalısti óltirip ketti
MÁSKEÝ. QazAqparat - RF SІM Ortalyq Afrıka Respýblıkasynda jýrnalıstik qujattary bar úsh Reseı azamatynyń qaza tapqanyn rastady, dep habarlaıdy TASS.
31 shildede Ortalyq Afrıka Respýblıkasynda úsh jýrnalıstiń qaza tapqany belgili boldy. Sıbıý qalasyna jaqyn mańda belgisiz qarýly adamdar toby shabýyl jasap, reseılik jýrnalıst Orhan Djemal, operator Kırıll Radchenko men rejısser Aleksandr Rastorgýevty óltirgen.
«Ortalyq Afrıka Respýblıkasynan túsip jatqan aqparat boıynsha, 30 shildede Sıbıý qalasyna jaqyn mańda (OAR astanasynan soltústikke qaraı 300 km - Bangı q.) Kırıll Radchenko, Aleksandr Rastorgýev jáne Orhan Djemal esimderine berilgen tek jýrnalıstik qujattary ǵana bar úsh adam qaza tapty», - dep habarlady RF SІM.
Vedomstvoda atalyp ótilgendeı, Reseı dıplomatııalyq mıssııa qyzmetkerleri jergilikti quqyq qorǵaý organdary men úkimettik qurylymdarmen tyǵyz baılanys jasap, oqıǵanyń mán-jaıyn anyqtap jatyr.
«OAR-daǵy Reseı elshiligi ókinishke oraı, eldiń aýmaǵyna reseılik jýrnalısterdiń kelgeni týraly bilmegen», - delingen habarlamada.
